shuaon ka safar

nafas nafas se navā-e-ġham kī ajiib lahreñ ubhar rahī haiñ

kabhī ye lahreñ sukūt-e-shab ko jhinjhoḌtī haiñ

kabhī sulagtī sadāoñ ko ḳhāmushī kī sarhad meñ moḌtī haiñ

samajh meñ aatā nahīñ hai āḳhir

ki ye mudāvā-e-sang-o-sar kā tilism

kab tak tanā rahegā

siyāh rātoñ kī hāñptī kāñptī fasīloñ se aage aage

jo mash.aleñ le ke DhūñDne kuchh nikal paḌe the

koī to pūchhe kahāñ ga.e vo

qadam qadam par jo raushnī ke

hazār-hā dā.ere banā kar palaT ga.e haiñ

kabhī to un ko bhī chal ke DhūñDeñ

ki kyā ajab

ye talāsh hī tishnagī ke sar-basta raaz khole

nafas nafas se nawa-e-gham ki ajib lahren ubhar rahi hain

kabhi ye lahren sukut-e-shab ko jhinjhoDti hain

kabhi sulagti sadaon ko KHamushi ki sarhad mein moDti hain

samajh mein aata nahin hai aaKHir

ki ye mudawa-e-sang-o-sar ka tilism

kab tak tana rahega

siyah raaton ki hanpti kanpti fasilon se aage aage

jo mashalen le ke DhunDne kuchh nikal paDe the

koi to puchhe kahan gae wo

qadam qadam par jo raushni ke

hazar-ha daere bana kar palaT gae hain

kabhi to un ko bhi chal ke DhunDen

ki kya ajab

ye talash hi tishnagi ke sar-basta raaz khole