شعاعوں کا سفر

نفس نفس سے نوائے غم کی عجیب لہریں ابھر رہی ہیں

کبھی یہ لہریں سکوت شب کو جھنجھوڑتی ہیں

کبھی سلگتی صداؤں کو خامشی کی سرحد میں موڑتی ہیں

سمجھ میں آتا نہیں ہے آخر

کہ یہ مداوائے سنگ و سر کا طلسم

کب تک تنا رہے گا

سیاہ راتوں کی ہانپتی کانپتی فصیلوں سے آگے آگے

جو مشعلیں لے کے ڈھونڈنے کچھ نکل پڑے تھے

کوئی تو پوچھے کہاں گئے وہ

قدم قدم پر جو روشنی کے

ہزار ہا دائرے بنا کر پلٹ گئے ہیں

کبھی تو ان کو بھی چل کے ڈھونڈیں

کہ کیا عجب

یہ تلاش ہی تشنگی کے سربستہ راز کھولے