shuur ki tah ke phaTakon par

maiñ jāntā huuñ

shu.ūr kī tah ke phāTakoñ par

jo qufl hai, vo kalīd bhī hai

maiñ jāntā huuñ ki phāTakoñ ko

maiñ khol saktā huuñ, jab bhī chāhūñ

magar mujhe apne jism ko bheñT karnā hogā

kaTānā hogā badan ko apne

ki jūñhī phāTak khuleñge mujh ko

bashar se haivān banñā hogā

karoḌoñ barsoñ ke irtiqā ko phalāñg kar pīchhe jaanā hogā

shu.ūr kī tah ke phāTakoñ se

pare jo baiThī hai kālī-devī

vahī mujhe ''irtiqā'' se pīchhe phalāñgne kā payām de kar

ye kah rahī hai ''tum ek haivāñ the, ek haivāñ ho

ye baat achchhī tarah samajh lo''

maiñ sun rahā huuñ ḳhud apnī āvāz meñ ye jumla

ki maiñ to tum tak pahuñch gayā thā guzishta shab

chāñd ke nikalne se pesh-tar hī

libās utre hue badan par

mirī ragoñ se umaDtā merā lahū

to tum ne zarūr dekhā hai, kaalī devī

vo haDDiyāñ jin se gosht nochā gayā thā merā

sapīd jaise dhulī huī hoñ!

uTho mire lā-shu.ūr meñ baiThī kālī-devī

mujhe sameTo siyāh bāhoñ meñ aage aa kar

ki maiñ ne ye bandagī itā.at

ḳhud apnī marzī se, apne dil se qubūl kī hai

mirā lahū, merī haDDiyāñ, merā gosht

hattā ki ruuh merī

tumheñ samarpan hai, merī devī

maiñ jāntā huuñ

shu.ūr kī tah ke phāTakoñ par

jo qufl hai vo kalīd bhī hai

magar kabhī ik savāl sā apnā sar uThātā hai mere dil meñ

kalīd ko pheñk duuñ agar to?

main jaanta hun

shuur ki tah ke phaTakon par

jo qufl hai, wo kalid bhi hai

main jaanta hun ki phaTakon ko

main khol sakta hun, jab bhi chahun

magar mujhe apne jism ko bhenT karna hoga

kaTana hoga badan ko apne

ki junhi phaTak khulenge mujh ko

bashar se haiwan banna hoga

karoDon barson ke irtiqa ko phalang kar pichhe jaana hoga

shuur ki tah ke phaTakon se

pare jo baiThi hai kali-dewi

wahi mujhe irtiqa se pichhe phalangne ka payam de kar

ye kah rahi hai tum ek haiwan the, ek haiwan ho

ye baat achchhi tarah samajh lo

main sun raha hun KHud apni aawaz mein ye jumla

ki main to tum tak pahunch gaya tha guzishta shab

chand ke nikalne se pesh-tar hi

libas utre hue badan par

meri ragon se umaDta mera lahu

to tum ne zarur dekha hai, kali dewi

wo haDDiyan jin se gosht nocha gaya tha mera

sapid jaise dhuli hui hon!

uTho mere la-shuur mein baiThi kali-dewi

mujhe sameTo siyah bahon mein aage aa kar

ki main ne ye bandagi itaat

KHud apni marzi se, apne dil se qubul ki hai

mera lahu, meri haDDiyan, mera gosht

hatta ki ruh meri

tumhein samarpan hai, meri dewi

main jaanta hun

shuur ki tah ke phaTakon par

jo qufl hai wo kalid bhi hai

magar kabhi ek sawal sa apna sar uThata hai mere dil mein

kalid ko phenk dun agar to?