سیڑھیوں پر دو شامیں

اس سنہری شام جب مندر کی سیڑھی پر

بچھائے دھوپ اوڑھے چھاؤں

ہم تم ساتھ بیٹھے تھے

بہت کچھ کہہ رہا تھا میں

بہت کچھ کہہ رہی تھیں تم

بہت کچھ سن رہے تھے ہم

ہماری پیٹھ کے پیچھے تو سورج ڈھل رہا تھا

پر مرے شانے پہ اک سورج ٹکا تھا

جس کی جگ مگ روشنی میں

آسماں اپنے ورق پر

پھر کوئی دل کش کہانی لکھ رہا تھا

کل پگھلتی شام آڈیٹوریم کی سیڑھیوں پر

ہم تھے آدھے پاس آدھے دور

گم صم ساتھ بیٹھے تھے

نہ تم کچھ کہہ رہی تھیں اور نہ میں کچھ کہہ رہا تھا

ایک چپی تھی جسے ہم سن رہے تھے

لیکن اب کی بار سورج سامنے ہی ڈھل رہا تھا

آسماں پر شام کی پرچھائیاں گہرا رہیں تھی

اور تاریکی فلک کے لوح پر لکھی ہوئی

اک اک عبارت کو مٹاتی جا رہی تھی

آسماں پر وہ کہانی جو ادھوری ہی لکھی تھی

دھیرے دھیرے مٹ رہی تھی

آسماں نیلے سے کالا اور کالا ہو گیا تھا