siDhiyon se upar ek makan

un sīḌhiyoñ par

aur un se uupar ek tañg makān ke farsh par

ikkīsvīñ sadī kā koī musavvir

vo hoñT daryāft nahīñ kar sakā

jo tumhāre pairoñ ko chuum nahīñ sake

aur makān kī vo dīvāreñ

jin se tumhārī kamar ragaḌ nahīñ khā sakī

aur koī nazm

tumhārī ḳhvāhish karne vaale vo lafz nahīñ DhūñD sakī

jo in sīḌhiyoñ se uupar

ek tañg makān kī dīvāroñ ke darmiyān

ek shaḳhs se farāmosh ho ga.e

yā jinheñ us ne

kāġhaz par darashtī se kaaT diyā

yā likhe baġhair tark kar diyā

yā apnī āñkhoñ ko sauñp diyā

ki ek roz tum unheñ āsānī se paḌh sako

aur ziyāda āsānī ke saath

un kā inkār kar sako

un siDhiyon par

aur un se upar ek tang makan ke farsh par

ikkiswin sadi ka koi musawwir

wo honT daryaft nahin kar saka

jo tumhaare pairon ko chum nahin sake

aur makan ki wo diwaren

jin se tumhaari kamar ragaD nahin kha saki

aur koi nazm

tumhaari KHwahish karne wale wo lafz nahin DhunD saki

jo in siDhiyon se upar

ek tang makan ki diwaron ke darmiyan

ek shaKHs se faramosh ho gae

ya jinhen us ne

kaghaz par darashti se kaT diya

ya likhe baghair tark kar diya

ya apni aankhon ko saunp diya

ki ek roz tum unhen aasani se paDh sako

aur ziyaada aasani ke sath

un ka inkar kar sako