silan

ham ne apne saath kī āḳhirī shab

būḌhe peḌ kī jhīnī chhatrī ke nīche

chāñd kī bhīgī bhīgī kirnoñ ke saath bitā.ī thī

maiñ ne apne ashkoñ kā ruḳh moḌ diyā thā

tum ne palkoñ se do motī mere kañdhe par Taañk diye the

aur māthe par kabhī na miTne vaalī

mohr lagā.ī thī ek giile bose kī

aglī shab

us peḌ ke nīche maiñ tanhā thā

chhūT gayā thā tum se jo rūmāl vahāñ par le aayā thā

barsoñ ba.ad isī shab kā

jānī-pahchānī ḳhushbū vaalī bhīgā-pan

nazmoñ kī ek bhūlī huī sī copy meñ

sīlan ban kar ubhrā hai

hum ne apne sath ki aaKHiri shab

buDhe peD ki jhini chhatri ke niche

chand ki bhigi bhigi kirnon ke sath bitai thi

main ne apne ashkon ka ruKH moD diya tha

tum ne palkon se do moti mere kandhe par Tank diye the

aur mathe par kabhi na miTne wali

mohr lagai thi ek gile bose ki

agli shab

us peD ke niche main tanha tha

chhuT gaya tha tum se jo rumal wahan par le aaya tha

barson baad isi shab ka

jaani-pahchani KHushbu wali bhiga-pan

nazmon ki ek bhuli hui si copy mein

silan ban kar ubhra hai