sita

tirā naam le kar sahar jāgtī hai

tire giit gaatī hai tāroñ kī mahfil

tirī ḳhāk-e-pā hind kā rāz-e-azmat

tirī zindagī mere ḳhvāboñ kī manzil

kahānī tirī sun ke tharrā uThī maiñ

dhaḌakne lagā dhīre dhīre mirā dil

chhupā.e haiñ siine meñ kuchh raaz apne

dakan ke kuhistāñ kī taptī chaTāneñ

musāfir kuchh aa.e the in jañgaloñ meñ

fazā meñ haiñ bikhrī huī dāstāneñ

vo hamdard āñkheñ vo bātoñ meñ jaadū

vo mazbūt baazū vo bhārī kamāneñ

vo ik ḳhud-farāmosh pī kī pujāran

kaTī pattiyoñ kī nadī kā kinārā

nigāhoñ se chhantā huā nūr-e-ulfat

jabīñ par farozāñ vafā kā sitāra

baraste hue phuul ḳhushiyoñ ke har sū

zamāna bhī thā ruk ke mahv-e-nazāra

vo paiham safar vo havādis ke tūfāñ

vo pairoñ meñ chhāle vo hañstī nigāheñ

kabhī dil ko ġhurbat meñ bahlā.e rakhnā

kabhī des kī yaad meñ sard aaheñ

rahī sālahā saal tū jāda-paimā

ye dhun thī ki tai hoñ riyāzat kī rāheñ

magar āzmā.ish thī kuchh aur baaqī

abhī sāmne aur bhī imtihāñ the

asīrī phir ik rākshas kī asīrī

bahut duur tujh se tire pāsbāñ the

tirī paak fitrat magar ik sipar thī

tire sāmne rākshas nā-tavāñ the

uThe phir tirā naam le kar javāñ kuchh

jarī hausla-mand sachche jiyāle

hilā Daale aivān ik saltanat ke

tire pāsbāñ the baḌe aan vaale

tirī vāpsī kar rahī thī ye elaañ

ki miTte nahīñ zulmatoñ se ujāle

sahe jo sitam ban ga.e sab fasāna

talāfī kā ab aa rahā thā zamāna

huī aah lekin ye kaisī talāfī

dobāra milā jañgaloñ meñ Thikāna

salīb ek baaqī thī jo māmtā kī

use bhī to lāzim thā tanhā uThānā

ajab haiñ ye asrār-e-rvasl-o-judā.ī

ki manzil ko pā kar bhī manzil na paa.ī

ye kaisā sitam thā ki iffat kī devī

subūt apnī iffat kā dene ko aa.e

vo sho.ale kī mānind sho.aloñ se guzrī

vo bijlī sī ban kar zamīñ meñ samā.ī

tera nam le kar sahar jagti hai

tere git gati hai taron ki mahfil

teri KHak-e-pa hind ka raaz-e-azmat

teri zindagi mere KHwabon ki manzil

kahani teri sun ke tharra uThi main

dhaDakne laga dhire dhire mera dil

chhupae hain sine mein kuchh raaz apne

dakan ke kuhistan ki tapti chaTanen

musafir kuchh aae the in jangalon mein

faza mein hain bikhri hui dastanen

wo hamdard aankhen wo baaton mein jadu

wo mazbut bazu wo bhaari kamanen

wo ek KHud-faramosh pi ki pujaran

kaTi pattiyon ki nadi ka kinara

nigahon se chhanta hua nur-e-ulfat

jabin par farozan wafa ka sitara

baraste hue phul KHushiyon ke har su

zamana bhi tha ruk ke mahw-e-nazara

wo paiham safar wo hawadis ke tufan

wo pairon mein chhaale wo hansti nigahen

kabhi dil ko ghurbat mein bahlae rakhna

kabhi des ki yaad mein sard aahen

rahi salaha sal tu jada-paima

ye dhun thi ki tai hon riyazat ki rahen

magar aazmaish thi kuchh aur baqi

abhi samne aur bhi imtihan the

asiri phir ek rakshas ki asiri

bahut dur tujh se tere pasban the

teri pak fitrat magar ek sipar thi

tere samne rakshas na-tawan the

uThe phir tera nam le kar jawan kuchh

jari hausla-mand sachche jiyale

hila Dale aiwan ek saltanat ke

tere pasban the baDe aan wale

teri wapsi kar rahi thi ye elan

ki miTte nahin zulmaton se ujale

sahe jo sitam ban gae sab fasana

talafi ka ab aa raha tha zamana

hui aah lekin ye kaisi talafi

dobara mila jangalon mein Thikana

salib ek baqi thi jo mamta ki

use bhi to lazim tha tanha uThana

ajab hain ye asrar-e-rwasl-o-judai

ki manzil ko pa kar bhi manzil na pai

ye kaisa sitam tha ki iffat ki dewi

subut apni iffat ka dene ko aae

wo shoale ki manind shoalon se guzri

wo bijli si ban kar zamin mein samai