silin figers

colombia ke duur darāz dehātoñ meñ

kokīn kī kāsht se pābandī uThā dī ga.ī hai

shumālī portugal kī surḳh maaoñ ke sapne

sunahre tambākū ke khetoñ meñ javān hote haiñ

cherī ke jañgaloñ kī aqbī samt se

niile parinde ke sar jhaTakne se pahle

baañs kī paTrī par

havā kī rail ġhusse bharī siiTī bajātī hai

bheḌoñ ke muhāfiz kutte kī niiñd ḳharāb hotī hai

vaqt kī vaadī meñ soī huī

sadī ke vahshī hoñToñ ko

mafrūr lamha chuum saktā hai

jackdaniels kā masḳh-shuda label

botal kī raakh sūñghtā hai

kāsnī mahbūba kī barahna piiTh par

surma.ī novel kā haath reñgtā hai

zabt kī dīvār meñ paivasta

shelf kī chhātī par auñdhe muñh paḌe

piile aur bosīda musavvadoñ se

jism kī rūmānviyat ko jaatā rasta

jis kī sākin āġhosh meñ

nazm ke cigarette-zada hoñToñ se girtī

nuqra.ī jhurriyoñ ke lāshe uuñgh rahe haiñ

saare manzar ko ek almārī ghuur rahī hai

pañkhe kī bhunbhunāhat so rahī hai

colombia ke dur daraaz dehaton mein

kokin ki kasht se pabandi uTha di gai hai

shumali portugal ki surKH maon ke sapne

sunahre tambaku ke kheton mein jawan hote hain

cheri ke jangalon ki aqbi samt se

nile parinde ke sar jhaTakne se pahle

bans ki paTri par

hawa ki rail ghusse bhari siTi bajati hai

bheDon ke muhafiz kutte ki nind KHarab hoti hai

waqt ki wadi mein soi hui

sadi ke wahshi honTon ko

mafrur lamha chum sakta hai

jackdaniels ka masKH-shuda label

botal ki rakh sunghta hai

kasni mahbuba ki barahna piTh par

surmai nowel ka hath rengta hai

zabt ki diwar mein paiwasta

shelf ki chhati par aundhe munh paDe

pile aur bosida musawwadon se

jism ki rumanwiyat ko jata rasta

jis ki sakin aaghosh mein

nazm ke cigarette-zada honTon se girti

nuqrai jhurriyon ke lashe ungh rahe hain

sare manzar ko ek almari ghur rahi hai

pankhe ki bhunbhunahat so rahi hai