silsila

kabhī kabhī ik kiran ujāle kī

mere kāñdhe pe haath rakh kar

ye pūchhtī hai

ki aur kitnā safar hai baaqī

huā hai tai kis qadar hai baaqī

ye rāsta karb-e-āgahī kā

kahāñ se niklā gayā kahāñ tak

charāġh ehsās-e-ḳhud-sarī kā

koī bhī likh kar koī bhī paḌh kar nahīñ batātā

nasīb kaisā hai aadmī kā

yaqīn-e-fikr-o-nazar hai baaqī

sarāb-e-jāñ rahguzar hai baaqī

magar kisī ko pata nahīñ hai hayāt-e-insāñ hai kitnī baaqī

bas ek maiñ huuñ ki karb-e-ehsās merā saaya

ye zaat kā ġham jo saath aaya

gumān kī āñdhiyoñ ne aksar mujhe khilāyā

nazar nazar ik charāġh āñkhoñ meñ jhilmilāyā

yaqīñ kī sūrat

zamīñ kī sūrat

tumhārī raushan jabīñ kī sūrat

maiñ ik sadāqat

charāġh-e-rāhat

vajūd-e-rif.at

maiñ zau-fishāñ huuñ

fanā kī vaadī se jism merā guzar bhī jaa.e

mirā badan lamha lamha ban kar bikhar bhī jaa.e

ye karb-e-fikr-o-nazar ye raushan zamīr merā

ye zaḳhm-e-tahqīq jo badan par likhā huā hai

ye zahr aur ik jo ragoñ meñ machal rahā hai

jise piyā hai samajh ke āb-e-hayāt merī jasāratoñ ne

har ek siine meñ biij botā rahegā merī tajalliyoñ ke

khilā.egā saañs saañs tahrīr raushnī kī

safar mirī kāvish-e-nazar kā

yaqīn kā rif.at-e-hunar kā

na ḳhatm hogā

kabhi kabhi ek kiran ujale ki

mere kandhe pe hath rakh kar

ye puchhti hai

ki aur kitna safar hai baqi

hua hai tai kis qadar hai baqi

ye rasta karb-e-agahi ka

kahan se nikla gaya kahan tak

charagh ehsas-e-KHud-sari ka

koi bhi likh kar koi bhi paDh kar nahin batata

nasib kaisa hai aadmi ka

yaqin-e-fikr-o-nazar hai baqi

sarab-e-jaan rahguzar hai baqi

magar kisi ko pata nahin hai hayat-e-insan hai kitni baqi

bas ek main hun ki karb-e-ehsas mera saya

ye zat ka gham jo sath aaya

guman ki aandhiyon ne aksar mujhe khilaya

nazar nazar ek charagh aankhon mein jhilmilaya

yaqin ki surat

zamin ki surat

tumhaari raushan jabin ki surat

main ek sadaqat

charagh-e-rahat

wajud-e-rifat

main zau-fishan hun

fana ki wadi se jism mera guzar bhi jae

mera badan lamha lamha ban kar bikhar bhi jae

ye karb-e-fikr-o-nazar ye raushan zamir mera

ye zaKHm-e-tahqiq jo badan par likha hua hai

ye zahr aur ek jo ragon mein machal raha hai

jise piya hai samajh ke aab-e-hayat meri jasaraton ne

har ek sine mein bij bota rahega meri tajalliyon ke

khilaega sans sans tahrir raushni ki

safar meri kawish-e-nazar ka

yaqin ka rifat-e-hunar ka

na KHatm hoga