silsila KHwabon ka

kitnī dilkash haiñ tere āriz-o-lab kī yādeñ

kis qadar tauba-shikan hai tirī zulfoñ kā ḳhayāl

kitnā pur-kaif tasavvur hai tirī āñkhoñ kā

taab kis ko hai jo dekhe tirī qāmat kā jamāl

tujh ko ik phuul kahūñ chāñd kahūñ ḳhvāb kahūñ

zehn-e-shā.ir meñ ba-yak-vaqt ye ubhre haiñ savāl

tere chehre ko sabhī ek kañval kahte haiñ

aur ham tujh ko sarāpā-e-ġhazal kahte haiñ

mere jazbāt farāvāñ mire zaḳhmoñ ke nishāñ

terī duzdīda-nigāhī kā gila karte haiñ

har ghaḌī phuul damakte hue ruḳhsāroñ ke

mere ehsās ke gulshan meñ khilā karte haiñ

kyā batā.ūñ tujhe apne dil-e-betāb kā haal

kitne dīpak mire siine meñ jalā karte haiñ

be-niyāz-e-ġham-e-ayyām mire zehn-o-nazar

gum sarāb-e-lab-o-āriz meñ rahā karte haiñ

tirī āvāz ke sho.aloñ meñ sahar jaltī hai

muskurāhaT meñ tirī barq-e-tapāñ paltī hai

lekin ai jān-e-suḳhan tujh ko ḳhabar hai ki nahīñ

mere kāshāna-e-ġhurbat pe nazar hai ki nahīñ

tū ki parvarda-e-āġhosh-e-nasīm-e-gulshan

jism-e-sīmīñ pe ye zartār tire pairāhan

garm jhoñkoñ kī ināyat se bacheñge kab tak

ḳhār-zār-e-ġham-e-hastī meñ raheñge kab tak

mutrib-e-vaqt kahīñ chheḌ na de talḳh ġhazal

Dar hai mismār na ho jaa.e ye naġhmoñ kā mahal

jān-e-jāñ silsila ḳhvāboñ kā kahīñ TuuT na jaa.e

tere hāthoñ se kahīñ jām-e-vafā chhūT na jaa.e

kitni dilkash hain tere aariz-o-lab ki yaaden

kis qadar tauba-shikan hai teri zulfon ka KHayal

kitna pur-kaif tasawwur hai teri aankhon ka

tab kis ko hai jo dekhe teri qamat ka jamal

tujh ko ek phul kahun chand kahun KHwab kahun

zehn-e-shair mein ba-yak-waqt ye ubhre hain sawal

tere chehre ko sabhi ek kanwal kahte hain

aur hum tujh ko sarapa-e-ghazal kahte hain

mere jazbaat farawan mere zaKHmon ke nishan

teri duzdida-nigahi ka gila karte hain

har ghaDi phul damakte hue ruKHsaron ke

mere ehsas ke gulshan mein khila karte hain

kya bataun tujhe apne dil-e-betab ka haal

kitne dipak mere sine mein jala karte hain

be-niyaz-e-gham-e-ayyam mere zehn-o-nazar

gum sarab-e-lab-o-ariz mein raha karte hain

teri aawaz ke shoalon mein sahar jalti hai

muskurahaT mein teri barq-e-tapan palti hai

lekin ai jaan-e-suKHan tujh ko KHabar hai ki nahin

mere kashana-e-ghurbat pe nazar hai ki nahin

tu ki parwarda-e-aghosh-e-nasim-e-gulshan

jism-e-simin pe ye zartar tere pairahan

garm jhonkon ki inayat se bachenge kab tak

KHar-zar-e-gham-e-hasti mein rahenge kab tak

mutrib-e-waqt kahin chheD na de talKH ghazal

Dar hai mismar na ho jae ye naghmon ka mahal

jaan-e-jaan silsila KHwabon ka kahin TuT na jae

tere hathon se kahin jam-e-wafa chhuT na jae