sipahi

tum us vaqt kyā the

tumhāre mahloñ tumhāre gharoñ meñ to sab kuchh thā

āsā.isheñ bhī vasīle bhī

us kibriyā.ī kī tamkanat bhī

sabhī kuchh tumhāre tasarruf meñ thā zindagī kā har ik aasrā bhī

kaḌe bām-o-dar bhī

chaman bhī samar bhī

magar tum ḳhud us vaqt kyā the

tumhārī nigāhoñ meñ duniyā dhueñ kā bhañvar thī

jab uḌtī halākat ke shahpar tumhāre saroñ par se guzre

tumhārī nigāhoñ meñ duniyā dhueñ kā bhañvar thī

agar is muqaddas zamīñ par

mirā ḳhuuñ na bahtā

agar dushmanoñ ke garāñDīl Tankoñ ke nīche

mirī kaḌkaḌātī huī haDDiyāñ ḳhandaqoñ meñ na hotīñ

to dozaḳh ke sho.ale tumhāre mo.attar gharoñdoñ kī dahlīz par the

tumhāre har ik besh-qīmat asāse kī qīmat

is surḳh miTTī se hai jis meñ merā lahū rach gayā hai

tum us waqt kya the

tumhaare mahlon tumhaare gharon mein to sab kuchh tha

aasaishen bhi wasile bhi

us kibriyai ki tamkanat bhi

sabhi kuchh tumhaare tasarruf mein tha zindagi ka har ek aasra bhi

kaDe baam-o-dar bhi

chaman bhi samar bhi

magar tum KHud us waqt kya the

tumhaari nigahon mein duniya dhuen ka bhanwar thi

jab uDti halakat ke shahpar tumhaare saron par se guzre

tumhaari nigahon mein duniya dhuen ka bhanwar thi

agar is muqaddas zamin par

mera KHun na bahta

agar dushmanon ke garanDil Tankon ke niche

meri kaDkaDati hui haDDiyan KHandaqon mein na hotin

to dozaKH ke shoale tumhaare moattar gharondon ki dahliz par the

tumhaare har ek besh-qimat asase ki qimat

is surKH miTTi se hai jis mein mera lahu rach gaya hai