sarsayyad ke mazar par

charāg-e-ilm raushan hai haqīqat kī havāoñ par

hukūmat kar rahā hai ek goshe se fazāoñ par

ye sar-sabzī-o-shādābī jo vīrānī kā hāsil hai

ragoñ meñ us kī poshīda tamavvuj-ḳhez ik dil hai

abhī tak ḳhaak meñ us kī hai josh-e-irtiqā baaqī

lahad par ghaas ke pattoñ meñ hai nashv-o-numā baaqī

abhī tak anjuman meñ guuñj baaqī hai sadāoñ kī

abhī tak kheltī hai ḳhaak se shoḳhī havāoñ kī

ye bazm-e-ḳhvāb-e-sarsayyad ye naqsh-e-azmat-e-rafta

mai-e-īsār se labrez hai ik jām-e-nūrānī

mohabbat kī tarah ābād rakkhegā ḳhudā us ko

miTā saktī nahīñ duniyā-e-hādis kī havā us ko

maiñ zauq-e-ilm le kar turbat-e-sayyad par aayā huuñ

aqīdat ke shagufta phuul apne saath laayā huuñ

tirī vahshat liye phirtī hai garm-e-justujū mujh ko

sukūñ-andoz hone kī bahut hai aarzū mujh ko

fazāoñ meñ mohabbat kī haqīqat āshnā huuñ maiñ

ik āġhosh-e-adab meñ parvarish paatā rahā huuñ maiñ

ba-qadr-e-zauq takmīl-e-tamannā kī tamannā hai

isī āġhosh meñ me.arāj-e-fardā kī tamannā hai

tamannā hai jahān-e-ilm meñ chamkūñ sahā ban kar

jumūd-e-zulmat-e-hastī pe chhā jā.ūñ ziyā bin kar

tamannā hai ki duniyā mujh se yaksar nuur ho jaa.e

ye tārīkī simaT kar ek din kāfūr ho jaa.e

tamannā hai ki sarsayyad banūñ yā 'shiblī'-o-'hālī'

ki in arbāb-e-mahfil kī abhī tak hai jagah ḳhālī

ilāhī ḳhāk-e-sarsayyad se kuchh chiñgāriyāñ de de

mazāq-e-dil tarastā hai tapish-sāmāniyāñ de de

mirī qismat meñ is mai-ḳhāne kā sāġhar nahīñ yārab

evaz meñ is ke mujh ko mashrab-e-pīr-e-muġhāñ de de

jahāñ ik tā.er-e-sidra kisī din chahchahāyā thā

unhīñ shāḳhoñ pe mujh ko iḳhtiyār-e-āshiyāñ de de

jo mere sāz-e-fitrat meñ nayā ik soz bharnā hai

tū 'jauhar' aur 'zafar' kaisī zabān-e-naġhma-ḳhvāñ de de

mujhe darkār hai phir mulk-o-millat kī hudī-ḳhvānī

'nazīr'-o-'shiblī'-o-'hālī' kā andāz-e-bayāñ de de

ġhubār-e-rah-guzār-e-dahr meñ ālūdgī kab tak

mire zarrīñ tasavvur ko bisāt-e-kahkashāñ de de

dimāġh-o-zehn meñ ik jañg barpā hai ḳhayāloñ kī

ise hamvār kar ke ik sukūn-e-jāvedāñ de de

agar hai qāfile ke saath chalnā merā nā-mumkin

to mujh ko rahnumā kar de mujhe ik kārvāñ de de

zamīñ par paañv phailāne kī gunjā.ish agar kam hai

mujhe bādal banā de sair ko ik āsmāñ de de

agar taḳh.īl-e-sarsayyad hai ab guldasta-e-māzī

javānī kī umañgoñ ko na.ī añgḌā.iyāñ de de

payām-e-kāmyābī de mujhe aivān-e-rif.at se

maiñ ḳhālī haath jā saktā nahīñ sayyad kī turbat se

charag-e-ilm raushan hai haqiqat ki hawaon par

hukumat kar raha hai ek goshe se fazaon par

ye sar-sabzi-o-shadabi jo virani ka hasil hai

ragon mein us ki poshida tamawwuj-KHez ek dil hai

abhi tak KHak mein us ki hai josh-e-irtiqa baqi

lahad par ghas ke patton mein hai nashw-o-numa baqi

abhi tak anjuman mein gunj baqi hai sadaon ki

abhi tak khelti hai KHak se shoKHi hawaon ki

ye bazm-e-KHwab-e-sarsayyad ye naqsh-e-azmat-e-rafta

mai-e-isar se labrez hai ek jam-e-nurani

mohabbat ki tarah aabaad rakkhega KHuda us ko

miTa sakti nahin duniya-e-hadis ki hawa us ko

main zauq-e-ilm le kar turbat-e-sayyad par aaya hun

aqidat ke shagufta phul apne sath laya hun

teri wahshat liye phirti hai garm-e-justuju mujh ko

sukun-andoz hone ki bahut hai aarzu mujh ko

fazaon mein mohabbat ki haqiqat aashna hun main

ek aaghosh-e-adab mein parwarish pata raha hun main

ba-qadr-e-zauq takmil-e-tamanna ki tamanna hai

isi aaghosh mein mearaj-e-farda ki tamanna hai

tamanna hai jahan-e-ilm mein chamkun saha ban kar

jumud-e-zulmat-e-hasti pe chha jaun ziya bin kar

tamanna hai ki duniya mujh se yaksar nur ho jae

ye tariki simaT kar ek din kafur ho jae

tamanna hai ki sarsayyad banun ya 'shibli'-o-'haali'

ki in arbab-e-mahfil ki abhi tak hai jagah KHali

ilahi KHak-e-sarsayyad se kuchh chingariyan de de

mazaq-e-dil tarasta hai tapish-samaniyan de de

meri qismat mein is mai-KHane ka saghar nahin yarab

ewaz mein is ke mujh ko mashrab-e-pir-e-mughan de de

jahan ek taer-e-sidra kisi din chahchahaya tha

unhin shaKHon pe mujh ko iKHtiyar-e-ashiyan de de

jo mere saz-e-fitrat mein naya ek soz bharna hai

tu 'jauhar' aur 'zafar' kaisi zaban-e-naghma-KHwan de de

mujhe darkar hai phir mulk-o-millat ki hudi-KHwani

'nazir'-o-'shibli'-o-'haali' ka andaz-e-bayan de de

ghubar-e-rah-guzar-e-dahr mein aaludgi kab tak

mere zarrin tasawwur ko bisat-e-kahkashan de de

dimagh-o-zehn mein ek jang barpa hai KHayalon ki

ise hamwar kar ke ek sukun-e-jawedan de de

agar hai qafile ke sath chalna mera na-mumkin

to mujh ko rahnuma kar de mujhe ek karwan de de

zamin par panw phailane ki gunjaish agar kam hai

mujhe baadal bana de sair ko ek aasman de de

agar taKHil-e-sarsayyad hai ab guldasta-e-mazi

jawani ki umangon ko nai angDaiyan de de

payam-e-kaamyabi de mujhe aiwan-e-rifat se

main KHali hath ja sakta nahin sayyad ki turbat se