sirf barha lagta hai yun

vaqt kī dastaras meñ lāzim

koī kīmiyā to zarūr hai

is taraf maiñ reza-reza bikhar rahā huuñ

aur us taraf

terī tasvīr meñ rafta-rafta

jaan paḌtī sī lag rahī hai

abhī lagā thā abhī tū ne kuchh kahā thā mujh se

mere taḳhayyul kī jannatoñ meñ

abhī surūr kī ka.ī jhāñjhareñ jhanak ga.ī thiiñ

vahm hī thā vo gumān thā vo

gumān kitnā hasīn thā vo

maiñ phir chāhtā huuñ mere masjūd

tū mujh se kuchh suḳhan kare

kuchh to bole kuchh to mujh se baat kare

is nannhī hasrat kā dāman thāme thāme

mez pe rakkhe frame ko maiñ takne lagtā huuñ

jis meñ tumhārī ek purānī

siyāh safed tasvīr lagī hai

phir maiñ tum ko chhū letā huuñ

phir tum se kuchh kah uThtā huuñ

phir lagtā hai jaise tum bhī

bol uThī ho

lekin tum kuchh nahīñ boltīñ

sirf bārhā lagtā hai yuuñ

waqt ki dastaras mein lazim

koi kimiya to zarur hai

is taraf main reza-reza bikhar raha hun

aur us taraf

teri taswir mein rafta-rafta

jaan paDti si lag rahi hai

abhi laga tha abhi tu ne kuchh kaha tha mujh se

mere taKHayyul ki jannaton mein

abhi surur ki kai jhanjharen jhanak gai thin

wahm hi tha wo guman tha wo

guman kitna hasin tha wo

main phir chahta hun mere masjud

tu mujh se kuchh suKHan kare

kuchh to bole kuchh to mujh se baat kare

is nannhi hasrat ka daman thame thame

mez pe rakkhe frame ko main takne lagta hun

jis mein tumhaari ek purani

siyah safed taswir lagi hai

phir main tum ko chhu leta hun

phir tum se kuchh kah uThta hun

phir lagta hai jaise tum bhi

bol uThi ho

lekin tum kuchh nahin boltin

sirf barha lagta hai yun