sitaron ke nagar mein

sitāroñ ke nagar jaane kā aksar sochte haiñ ham

tumheñ apnā banāne kā bhī aksar sochte haiñ ham

ufuq ke paar jā kar chāñd taare DhūñD laane kī hamārī aarzū dekho

chalo kuchh der ḳhud ko ham tumhāre rū-ba-rū kar deñ

sitāroñ ke nagar jaane kī ḳhvāhish multavī kar deñ

ki ham jab tum ko apne sāmne paa.eñ

to saare bhīge manzar dhīre dhīre ḳhud badal jaa.eñ

zamīñ tabdīl ho kar āsmāñ ban kar hamāre sar pe chhā jaa.e

ghane bādal chhaTeñ aur saare taare dhīre dhīre se hamāre gird aa jaa.eñ

bahut se zard patte phuul ban jaa.eñ

aur aise meñ hamāre dil kī dhaḌkan meñ na.e jazbe machal jaa.eñ

chalo haañ yuuñ bhī achchhā hai

ye sarhad dil kī sarhad hai

ye vaadī hai mohabbat kī

jahāñ rañgoñ kī mahfil hai

jahāñ ḳhushiyoñ kā melā hai

jahāñ kuchh nannhī nannhī ḳhvāhishoñ kā ik jhamelā hai

chalo ye shaam yuuñ hī saj ga.ī hai

ham sitāroñ ke nagar jaane kī ḳhvāhish multavī kar deñ

ki chandā ḳhud zamīñ par aa ga.e haiñ

dil ke āñgan meñ sitāre nannhī nannhī ḳhvāhishoñ ke saj ga.e haiñ

sitaron ke nagar jaane ka aksar sochte hain hum

tumhein apna banane ka bhi aksar sochte hain hum

ufuq ke par ja kar chand tare DhunD lane ki hamari aarzu dekho

chalo kuchh der KHud ko hum tumhaare ru-ba-ru kar den

sitaron ke nagar jaane ki KHwahish multawi kar den

ki hum jab tum ko apne samne paen

to sare bhige manzar dhire dhire KHud badal jaen

zamin tabdil ho kar aasman ban kar hamare sar pe chha jae

ghane baadal chhaTen aur sare tare dhire dhire se hamare gird aa jaen

bahut se zard patte phul ban jaen

aur aise mein hamare dil ki dhaDkan mein nae jazbe machal jaen

chalo han yun bhi achchha hai

ye sarhad dil ki sarhad hai

ye wadi hai mohabbat ki

jahan rangon ki mahfil hai

jahan KHushiyon ka mela hai

jahan kuchh nannhi nannhi KHwahishon ka ek jhamela hai

chalo ye sham yun hi saj gai hai

hum sitaron ke nagar jaane ki KHwahish multawi kar den

ki chanda KHud zamin par aa gae hain

dil ke aangan mein sitare nannhi nannhi KHwahishon ke saj gae hain