sitam-gar

tum mujh par vārid hue

ik sitamgar kī tarah

may kī vo shaam thī

mujhe aaj bhī yaad hai

safed rañg kī shirt pahne

haath meñ aḳhbār rol kiye

tum pinDāl kī kursī par birājmān the

pahlī nazar meñ tum aam se the

jaise tum āshiq ho aur maiñ mahbūb

merī nazar kā lams tumheñ ḳhāsā ḳhaas kar gayā

dekho

kahānī ne palTā khāyā

tum muhib ban ga.e aur maiñ dīvānī kahlā.ī

mere aate hī tum simaT ga.e

tab se aaj tak vaise hī merī ruuh meñ

ek koñpal kī tarah simTe baiThe ho

maiñ muntazir huuñ

kab ehsās kā nāzuk parinda añgḌā.ī le

tum apnī bāñheñ phailā.e

isī pinDāl kī isī kursī par

gahrī ḳhāmoshī se shor karte hue

merī taraf baḌho

ki dekhne vāloñ ko pākīza mohabbat

raqs kartī dikhā.ī de

jis meñ na numā.ish ho na havas

bas ik surūr ho

aur maiñ

maiñ zamīn ke isī be-bas be-his TukḌe par āñkheñ mūñde tumheñ dekhtī rahūñ

pachhtāve kā jaal aaj tak mujhe lapeT meñ jakḌe hai

maiñ kisī asīr-zādī kī tarah

apnī qaid ko taqdīr kā likhā jaan kar ḳhush huuñ

maiñ iz.hār-o-iqrār se barī

apnī ḳhvāhish par hayā kī chādar Daale

mohabbat kā tauq gale meñ laTkā.e

ḳhamoshī ko laboñ par sajā.e

nā-ummīdī ko shikast dete hue

gūñgī bahrī andhī mohabbat par iktifā kiye hue huuñ

ki asiir ḳhvāhish-o-farmā.ish kā haq nahīñ rakhte

tum mujh par warid hue

ek sitamgar ki tarah

may ki wo sham thi

mujhe aaj bhi yaad hai

safed rang ki shirt pahne

hath mein aKHbar rol kiye

tum pinDal ki kursi par birajman the

pahli nazar mein tum aam se the

jaise tum aashiq ho aur main mahbub

meri nazar ka lams tumhein KHasa KHas kar gaya

dekho

kahani ne palTa khaya

tum muhib ban gae aur main diwani kahlai

mere aate hi tum simaT gae

tab se aaj tak waise hi meri ruh mein

ek konpal ki tarah simTe baiThe ho

main muntazir hun

kab ehsas ka nazuk parinda angDai le

tum apni banhen phailae

isi pinDal ki isi kursi par

gahri KHamoshi se shor karte hue

meri taraf baDho

ki dekhne walon ko pakiza mohabbat

raqs karti dikhai de

jis mein na numaish ho na hawas

bas ek surur ho

aur main

main zamin ke isi be-bas be-his TukDe par aankhen munde tumhein dekhti rahun

pachhtawe ka jal aaj tak mujhe lapeT mein jakDe hai

main kisi asir-zadi ki tarah

apni qaid ko taqdir ka likha jaan kar KHush hun

main izhaar-o-iqrar se bari

apni KHwahish par haya ki chadar Dale

mohabbat ka tauq gale mein laTkae

KHamoshi ko labon par sajae

na-ummidi ko shikast dete hue

gungi bahri andhi mohabbat par iktifa kiye hue hun

ki asir KHwahish-o-farmaish ka haq nahin rakhte