siyah aaine

maiñ kab se qaid huuñ

batāo kab se qaid huuñ

siyāh ā.īnoñ ke darmiyāñ

siyāhiyoñ ke āfrīda

ye siyāh-dil siyāh-batn ā.īne

ki jin ke hausle siyāh haiñ

ki jin ke valvale siyāh haiñ

ki jin ke qahqahe siyāh haiñ

siyāh qahqahoñ se naġhma-e-sukūt muntashir

siyāh beḌiyoñ se masti-e-ḳhirām munjamid

siyāh hādsoñ se vaqt-e-tezgām jāñ-balab

siyāh kirchiyoñ se raqs-e-nā-tamām ḳhūñ-chakāñ

siyāh sāzishoñ meñ munhamik

ye ā.īne

ki jin meñ merā aks-e-ruḳh siyāh ho gayā

kiran kiran siyāhiyoñ meñ gosha-gīr

nafas-nafas siyāhiyoñ meñ hai asiir

vo habs hai ki al-amāñ

maiñ kab se qaid huuñ

batā.ūñ kaise kab se qaid huuñ

siyāh ā.īnoñ ke darmiyāñ

main kab se qaid hun

batao kab se qaid hun

siyah aainon ke darmiyan

siyahiyon ke aafrida

ye siyah-dil siyah-batn aaine

ki jin ke hausle siyah hain

ki jin ke walwale siyah hain

ki jin ke qahqahe siyah hain

siyah qahqahon se naghma-e-sukut muntashir

siyah beDiyon se masti-e-KHiram munjamid

siyah hadson se waqt-e-tezgam jaan-balab

siyah kirchiyon se raqs-e-na-tamam KHun-chakan

siyah sazishon mein munhamik

ye aaine

ki jin mein mera aks-e-ruKH siyah ho gaya

kiran kiran siyahiyon mein gosha-gir

nafas-nafas siyahiyon mein hai asir

wo habs hai ki al-aman

main kab se qaid hun

bataun kaise kab se qaid hun

siyah aainon ke darmiyan