siyah hote gulabon ka nauha

baḌhtī huī ḳhunkī ke saath

daraḳhtoñ ne

libās badalnā shurūa kiyā

ajab rut hai

zardī meñ malbūs ashjār

ḳhāmosh khaḌe haiñ

hijr zada barahna Tahniyāñ

sard havā ke sāmne bebas pattoñ kī

chīḳh-o-pukār sun kar bhī un kī

madad na kar sakeñ

tanhā.ī kisī jhoñke kī tarah nāchtī huī gulistāñ meñ dāḳhil huī

aur ek safed phuul toḌ kar

ḳhaak pe pheñkā

chaman ke saare phuul murjhāne lage

rangat kī tabdīlī kā mātam thā yā phir

is phuul ke miTTī hone kā

maiñ ek kone meñ baiThī

be-rahm mausamoñ ke tuyūr

uḌte hue dekh kar

soch rahī huuñ

mujhe ab

siyāh hote gulāboñ kā nauha likhnā hai

baDhti hui KHunki ke sath

daraKHton ne

libas badalna shurua kiya

ajab rut hai

zardi mein malbus ashjar

KHamosh khaDe hain

hijr zada barahna Tahniyan

sard hawa ke samne bebas patton ki

chiKH-o-pukar sun kar bhi un ki

madad na kar saken

tanhai kisi jhonke ki tarah nachti hui gulistan mein daKHil hui

aur ek safed phul toD kar

KHak pe phenka

chaman ke sare phul murjhane lage

rangat ki tabdili ka matam tha ya phir

is phul ke miTTi hone ka

main ek kone mein baiThi

be-rahm mausamon ke tuyur

uDte hue dekh kar

soch rahi hun

mujhe ab

siyah hote gulabon ka nauha likhna hai