siyasat

bāñdh ke ghuñghrū siyāsat hī nachātī hai hameñ

aur ham nāchte rahte haiñ tavā.if kī tarah

aur hukūmat ke ishāroñ pe hamāre Thumke

ye batāte haiñ ki ham bhī haiñ razā-mand yahāñ

kaun haiñ kans yā rāvan ke taraf-dār kaho

kaun ham meñ se hai zālim kā taraf-dār kaho

vaqt be-vaqt mile zaḳhm ke nāsūr to haiñ

ham bhī iisā pe hue zulm se ranjūr to haiñ

sun bhī lo hazrat-e-shabbīr pe rone vaalo

in mazālim pe yahāñ ashk-bār ham bhī to haiñ

haiñ agar raam hamāre to tumhāre bhī to haiñ

bas mohammad haiñ musalmāñ ke to aisā bhī nahīñ

gāmzan rāh-e-sadāqat pe agar haiñ ham bhī

to ye nānak pe kisī qaum kā da.avā kyoñ ho

ab hameñ kaun paḌhātā hai ye nafrat ke sabaq

ye vahī qaum hai kahte haiñ siyāsat jis ko

bāñdh ke ghuñghrū siyāsat hī nachātī hai hameñ

aur ham nāchte rahte haiñ tavā.if kī tarah

bandh ke ghunghru siyasat hi nachati hai hamein

aur hum nachte rahte hain tawaif ki tarah

aur hukumat ke ishaaron pe hamare Thumke

ye batate hain ki hum bhi hain raza-mand yahan

kaun hain kans ya rawan ke taraf-dar kaho

kaun hum mein se hai zalim ka taraf-dar kaho

waqt be-waqt mile zaKHm ke nasur to hain

hum bhi isa pe hue zulm se ranjur to hain

sun bhi lo hazrat-e-shabbir pe rone walo

in mazalim pe yahan ashk-bar hum bhi to hain

hain agar ram hamare to tumhaare bhi to hain

bas mohammad hain musalman ke to aisa bhi nahin

gamzan rah-e-sadaqat pe agar hain hum bhi

to ye nanak pe kisi qaum ka dawa kyon ho

ab hamein kaun paDhata hai ye nafrat ke sabaq

ye wahi qaum hai kahte hain siyasat jis ko

bandh ke ghunghru siyasat hi nachati hai hamein

aur hum nachte rahte hain tawaif ki tarah