siyasi leader ke nam

sāl-hā-sāl ye be-āsrā jakḌe hue haath

raat ke saḳht o siyah siine maiñ paivast rahe

jis tarah tinkā samundar se ho sargarm-e-satīz

jis tarah tītarī kohsār pe yalġhār kare

aur ab raat ke sañgīn o siyah siine meñ

itne ghaav haiñ ki jis samt nazar jaatī hai

jā-ba-jā nuur nai ik jaal sā bun rakhā hai

duur se sub.h kī dhaḌkan kī sadā aatī hai

terā sarmāya tirī aas yahī haath to haiñ

aur kuchh bhī to nahīñ paas yahī haath to haiñ

tujh ko manzūr nahīñ ġhalba-e-zulmat lekin

tujh ko manzūr hai ye haath qalam ho jaa.eñ

aur mashriq kī kamīñ-gah meñ dhaḌaktā huā din

raat kī āhanī mayyat ke tale dab jaa.e!

sal-ha-sal ye be-asra jakDe hue hath

raat ke saKHt o siyah sine main paiwast rahe

jis tarah tinka samundar se ho sargarm-e-satiz

jis tarah titari kohsar pe yalghaar kare

aur ab raat ke sangin o siyah sine mein

itne ghaw hain ki jis samt nazar jati hai

ja-ba-ja nur nai ek jal sa bun rakha hai

dur se subh ki dhaDkan ki sada aati hai

tera sarmaya teri aas yahi hath to hain

aur kuchh bhi to nahin pas yahi hath to hain

tujh ko manzur nahin ghalba-e-zulmat lekin

tujh ko manzur hai ye hath qalam ho jaen

aur mashriq ki kamin-gah mein dhaDakta hua din

raat ki aahani mayyat ke tale dab jae!