sochiye

jashn-e-jamhūr manānā hai magar socho to

jashn-e-jamhūr manāne kā hameñ haq bhī hai

mulk āzād hue ho gayā arsa lekin

vahī sarmāya-parastī hai vahī nādārī

bakriyāñ aaj bhī pyāsī nazar aatī haiñ mujhe

ghaaT par ab bhī hai sheroñ kī ijāra-dārī

haañ vahī log zamāna jinheñ kahtā hai ġharīb

ab to pahle se bhī chhoTe nazar aate haiñ mujhe

nazm-e-jamhūr kī saugand palānoñ kī qasam

seTh jī aur bhī moTe nazar aate haiñ mujhe

hai dimāġhoñ meñ vahī firqa-parastī kā junūñ

yuuñ to kahne ko hai ā.īn-e-vatan jamhūrī

gaa.e bailoñ pe jhagaḌte haiñ abhī tak insāñ

aaj bhī shaiḳh-o-barahman meñ hai kitnī duurī

haiñ abhī ahd-e-ġhulāmī kī vo farsūda rusūm

had-e-tahzīb-o-tamaddun se har ek out hai

dekhiye jashn-e-masarrat kā nirālā andāz

ghar munavvar haiñ dimāġhoñ meñ black out hai

haisiyat itnī sī rakhtā hai ye jashn-e-jamhūr

buġhz kā dev kisī roz to so jaatā hai

is bahāne hī mire des meñ ik saal ke baad

ek din zikr-e-musāvāt to ho jaatā hai

jashn-e-jamhur manana hai magar socho to

jashn-e-jamhur manane ka hamein haq bhi hai

mulk aazad hue ho gaya arsa lekin

wahi sarmaya-parasti hai wahi nadari

bakriyan aaj bhi pyasi nazar aati hain mujhe

ghaT par ab bhi hai sheron ki ijara-dari

han wahi log zamana jinhen kahta hai gharib

ab to pahle se bhi chhoTe nazar aate hain mujhe

nazm-e-jamhur ki saugand palanon ki qasam

seTh ji aur bhi moTe nazar aate hain mujhe

hai dimaghon mein wahi firqa-parasti ka junun

yun to kahne ko hai aain-e-watan jamhuri

gae bailon pe jhagaDte hain abhi tak insan

aaj bhi shaiKH-o-barahman mein hai kitni duri

hain abhi ahd-e-ghulami ki wo farsuda rusum

had-e-tahzib-o-tamaddun se har ek out hai

dekhiye jashn-e-masarrat ka nirala andaz

ghar munawwar hain dimaghon mein black out hai

haisiyat itni si rakhta hai ye jashn-e-jamhur

bughz ka dew kisi roz to so jata hai

is bahane hi mere des mein ek sal ke baad

ek din zikr-e-musawat to ho jata hai