sochne do

ik zarā sochne do

is ḳhayābāñ meñ

jo is lahza bayābāñ bhī nahīñ

kaun sī shāḳh meñ phuul aa.e the sab se pahle

kaun be-rañg huī rañj-o-ta.ab se pahle

aur ab se pahle

kis ghaḌī kaun se mausam meñ yahāñ

ḳhuun kā qaht paḌā

gul kī shah-rag pe kaḌā

vaqt paḌā

sochne do

sochne do

ik zarā sochne do

ye bharā shahr jo ab vādi-e-vīrāñ bhī nahīñ

is meñ kis vaqt kahāñ

aag lagī thī pahle

is ke saf-basta darīchoñ meñ se kis meñ avval

zah huī surḳh shuāoñ kī kamāñ

kis jagah jot jagī thī pahle

sochne do

ham se us des kā tum naam o nishāñ pūchhte ho

jis kī tārīḳh na juġhrāfiya ab yaad aa.e

aur yaad aa.e to mahbūb-e-guzishta yaad aa.e

rū-ba-rū aane se jī ghabrā.e

haañ magar jaise koī

aise mahbūb yā mahbūba kā dil rakhne ko

aa nikaltā hai kabhī raat bitāne ke liye

ham ab us umr ko aa pahuñche haiñ jab ham bhī yūñhī

dil se mil aate haiñ bas rasm nibhāne ke liye

dil kī kyā pūchhte ho

sochne do

ek zara sochne do

is KHayaban mein

jo is lahza bayaban bhi nahin

kaun si shaKH mein phul aae the sab se pahle

kaun be-rang hui ranj-o-tab se pahle

aur ab se pahle

kis ghaDi kaun se mausam mein yahan

KHun ka qaht paDa

gul ki shah-rag pe kaDa

waqt paDa

sochne do

sochne do

ek zara sochne do

ye bhara shahr jo ab wadi-e-viran bhi nahin

is mein kis waqt kahan

aag lagi thi pahle

is ke saf-basta darichon mein se kis mein awwal

zah hui surKH shuaon ki kaman

kis jagah jot jagi thi pahle

sochne do

hum se us des ka tum nam o nishan puchhte ho

jis ki tariKH na jughrafiya ab yaad aae

aur yaad aae to mahbub-e-guzishta yaad aae

ru-ba-ru aane se ji ghabrae

han magar jaise koi

aise mahbub ya mahbuba ka dil rakhne ko

aa nikalta hai kabhi raat bitane ke liye

hum ab us umr ko aa pahunche hain jab hum bhi yunhi

dil se mil aate hain bas rasm nibhane ke liye

dil ki kya puchhte ho

sochne do