sota jagta saya

tū chalī jā ki mujhe terī zarūrat bhī nahīñ

maiñ shab-o-roz kī miTTī se dobāra bhī janam le lūñgā

maiñ jo zindoñ meñ huuñ zindoñ meñ nahīñ

maiñ parindoñ meñ darindoñ meñ nahīñ

faqat insānoñ meñ maujūd hai saaya merā

muddateñ biit ga.ī haiñ magar anjām na aayā merā

maiñ sipāhī to nahīñ phir bhī laḌī haiñ ka.ī jañgeñ maiñ ne

pahlī hī jañg thī vo jis meñ kaTe haath mire

dūsrī jañg meñ baazū bhī ga.e

tīsrī jañg meñ phūTī mirī donoñ āñkheñ

aur phir jañg pe jañg

ab mire jism kā hissa nahīñ aisā koī

jis meñ zaḳhmoñ ke nishāñ raat se kam gahre hoñ

āḳhirī zaḳhm lagāyā tū ne

tū ne ḳhāmoshī kī shamshīr se maarā mujh ko

ab janam lenā hai duniyā meñ dobāra mujh ko

phir na.e haath na.e baazū na.ī aañkh lagānī hai mujhe

phir masīhā.ī dikhānī hai mujhe

phir na.ī jañg kī karnī hai mujhe tayyārī

aañkh ko phoḌnā hai DhūñDnī hai bedārī

tū mujhe maar ke ḳhush thī ki maiñ mar jā.ūñgā

sūkhī miTTī kī tarah ḳhud hī bikhar jā.ūñgā

magar ai merī aziyyat kī amiiñ

maiñ tire ḳhuun meñ maujūd rahūñgā har vaqt

surḳh zarroñ kī tarah jin meñ havā hotī hai

zinda rahne kī adā hotī hai

tū mujhe kaun sī talvār se kāTegī batā

ab safar merā tirī chaltī huī saañs ke andar hogā

tu chali ja ki mujhe teri zarurat bhi nahin

main shab-o-roz ki miTTi se dobara bhi janam le lunga

main jo zindon mein hun zindon mein nahin

main parindon mein darindon mein nahin

faqat insanon mein maujud hai saya mera

muddaten bit gai hain magar anjam na aaya mera

main sipahi to nahin phir bhi laDi hain kai jangen main ne

pahli hi jang thi wo jis mein kaTe hath mere

dusri jang mein bazu bhi gae

tisri jang mein phuTi meri donon aankhen

aur phir jang pe jang

ab mere jism ka hissa nahin aisa koi

jis mein zaKHmon ke nishan raat se kam gahre hon

aaKHiri zaKHm lagaya tu ne

tu ne KHamoshi ki shamshir se mara mujh ko

ab janam lena hai duniya mein dobara mujh ko

phir nae hath nae bazu nai aankh lagani hai mujhe

phir masihai dikhani hai mujhe

phir nai jang ki karni hai mujhe tayyari

aankh ko phoDna hai DhunDni hai bedari

tu mujhe mar ke KHush thi ki main mar jaunga

sukhi miTTi ki tarah KHud hi bikhar jaunga

magar ai meri aziyyat ki amin

main tere KHun mein maujud rahunga har waqt

surKH zarron ki tarah jin mein hawa hoti hai

zinda rahne ki ada hoti hai

tu mujhe kaun si talwar se kaTegi bata

ab safar mera teri chalti hui sans ke andar hoga