soz-e-dil

dil hai faulād kā patthar kā jigar rakhte haiñ

jaan jokhoñ meñ kaf-e-dast pe sar rakhte haiñ

ḳhuuñ rulā.egā tujhe bhī merā afsāna-e-ġham

ham-qafas pūchh na kyoñ dīda-e-tar rakhte haiñ

kyoñ na taḌpā.e hameñ apne vatan kī hālat

soz-e-dil rakhte haiñ ham dard-e-jigar rakhte haiñ

ai jafā-kār tū mazlūm kī fariyād se Dar

ye vo bande haiñ ki aahoñ meñ sharar rakhte haiñ

vo tahī-dast haiñ jo zor na zar rakhte haiñ

jazba-e-hubb-e-vatan dil meñ magar rakhte haiñ

kis ko dete haiñ bhalā dār-o-rasan kī dhamkī

kyā Darāte ho ki ham tīr-o-tabar rakhte haiñ

ham ko pistaul kā Dar hai na mashīnoñ kā ḳhatar

mard-e-maidān haiñ ham sīna-sipar rakhte haiñ

koī bhālā hai na ḳhanjar hai na bam hāthoñ meñ

aur na talvār ko ham zeb-e-kamar rakhte haiñ

tum ko tāqat kā bharosa hai jo bedād-garo

ham ko ye naaz ki nāloñ meñ asar rakhte haiñ

rahnumāoñ kī tamanna hai na rahzan kā ḳhatar

ham vo rah-rau haiñ ki manzil pe nazar rakhte haiñ

ham bhī āzād vatan ko kabhī dekheñ 'sābir'

ye duā vird-e-zabāñ shām-o-sahar rakhte haiñ

dil hai faulad ka patthar ka jigar rakhte hain

jaan jokhon mein kaf-e-dast pe sar rakhte hain

KHun rulaega tujhe bhi mera afsana-e-gham

ham-qafas puchh na kyon dida-e-tar rakhte hain

kyon na taDpae hamein apne watan ki haalat

soz-e-dil rakhte hain hum dard-e-jigar rakhte hain

ai jafa-kar tu mazlum ki fariyaad se Dar

ye wo bande hain ki aahon mein sharar rakhte hain

wo tahi-dast hain jo zor na zar rakhte hain

jazba-e-hubb-e-watan dil mein magar rakhte hain

kis ko dete hain bhala dar-o-rasan ki dhamki

kya Daraate ho ki hum tir-o-tabar rakhte hain

hum ko pistaul ka Dar hai na mashinon ka KHatar

mard-e-maidan hain hum sina-sipar rakhte hain

koi bhaala hai na KHanjar hai na bam hathon mein

aur na talwar ko hum zeb-e-kamar rakhte hain

tum ko taqat ka bharosa hai jo bedad-garo

hum ko ye naz ki nalon mein asar rakhte hain

rahnumaon ki tamanna hai na rahzan ka KHatar

hum wo rah-rau hain ki manzil pe nazar rakhte hain

hum bhi aazad watan ko kabhi dekhen 'sabir'

ye dua wird-e-zaban sham-o-sahar rakhte hain