starwation

azīzam

tum ye kyā jaano

ki jis ko bhuuk kahte haiñ

vo kyā 'ifrīt hai

kaise nigal jaatī hai har ehsās ko

insāñ nigal sakte haiñ ik duuje ko kachchā bhī

jo sach pūchho kisī rishte ke kuchh mā'nī nahīñ rahte

'ajab pāgal se lagte haiñ

ye dānish-var jahāñ-bhar ke

bharā ho peT to ye art culture aur tradition

sabhī kuchh sūjhne lagtā hai sab kuchh yaad aatā hai

faroġh-e-fan hai mumkin jab na koī faqr-o-fāqa ho

corona ke dinoñ meñ kyā huā thā yaad hai tum ko

sabhī ashyā-e-ḳhurd-o-nosh ko mahfūz karne ko

liye jaate the bhar bhar kar trolly

log kuchh aise

ki jaise phir kabhī un ko

na khāne ko milegā ek tinkā zindagānī meñ

na chhoḌā thā unhoñ ne kuchh bhī baaqī

un sToroñ meñ

na auroñ kā unheñ ik pal zarā sā bhī ḳhayāl aayā

ḳharīdārī kī ḳhātir

dūsre jo log aa.e the

vo ḳhālī jā rahe the

kis qadar māyūs lagte the

unheñ ye lag rahā thā ab ki shāyad qaht utrā hai

zarā socho ki jin ḳhittoñ meñ jaarī

qaht hai kab se

vo kaise jī rahe haiñ mar rahe haiñ duur nazroñ se

faqat ham dekhte sunte haiñ T v par

yā phir ḳhabroñ meñ paḌh kar

chand lamhe soch meñ paḌ kar

dubāra ziist kī sargarmiyoñ meñ

lauT jaate haiñ

azīzam

hai du'ā merī

kabhī ġhurbat na tum dekho

na hargiz bhuuk se hī āshnā.ī ho

sabhī qadroñ ko ye pāmāl kar ke

ek insāñ ko

banā detī hai vahshī aur darinda

aur behis bhī

dikhā.ī jis ko kuchh detā nahīñ hai

bhuuk se baḌh kar

ki tum sone kā chamcha le ke is duniyā meñ aa.e ho

tumheñ mā'lūm kyā

is bhuuk kī ye aag kaisī hai

chalo achchhā hai tum nā-āshnā ho

is musībat se

azizam

tum ye kya jaano

ki jis ko bhuk kahte hain

wo kya 'ifrit hai

kaise nigal jati hai har ehsas ko

insan nigal sakte hain ek duje ko kachcha bhi

jo sach puchho kisi rishte ke kuchh ma'ni nahin rahte

'ajab pagal se lagte hain

ye danish-war jahan-bhar ke

bhara ho peT to ye art culture aur tradition

sabhi kuchh sujhne lagta hai sab kuchh yaad aata hai

farogh-e-fan hai mumkin jab na koi faqr-o-faqa ho

corona ke dinon mein kya hua tha yaad hai tum ko

sabhi ashya-e-KHurd-o-nosh ko mahfuz karne ko

liye jate the bhar bhar kar trolly

log kuchh aise

ki jaise phir kabhi un ko

na khane ko milega ek tinka zindagani mein

na chhoDa tha unhon ne kuchh bhi baqi

un sToron mein

na auron ka unhen ek pal zara sa bhi KHayal aaya

KHaridari ki KHatir

dusre jo log aae the

wo KHali ja rahe the

kis qadar mayus lagte the

unhen ye lag raha tha ab ki shayad qaht utra hai

zara socho ki jin KHitton mein jari

qaht hai kab se

wo kaise ji rahe hain mar rahe hain dur nazron se

faqat hum dekhte sunte hain T w par

ya phir KHabron mein paDh kar

chand lamhe soch mein paD kar

dubara zist ki sargarmiyon mein

lauT jate hain

azizam

hai du'a meri

kabhi ghurbat na tum dekho

na hargiz bhuk se hi aashnai ho

sabhi qadron ko ye pamal kar ke

ek insan ko

bana deti hai wahshi aur darinda

aur behis bhi

dikhai jis ko kuchh deta nahin hai

bhuk se baDh kar

ki tum sone ka chamcha le ke is duniya mein aae ho

tumhein ma'lum kya

is bhuk ki ye aag kaisi hai

chalo achchha hai tum na-ashna ho

is musibat se