status marriage

maiñ ne status kī ḳhātir kar to lī shādī magar

mashriqī shauhar ko din meñ aa ga.e taare nazar

naav jo mujh ko milī zinda thā is kā nāḳhudā

merī manzūr-e-nazar pahle se thī shādī-shudā

bar-banā.e-maslahat mujh ko hasīñ lagtī thī vo

thī ''citizen'' aur kahīñ se zan nahīñ lagtī thī vo

aaise aaise gul khilā.e us but-e-gulfām ne

murġh ko ullū banā detī thī mere sāmne

kyā pata thā mujh ko pachhtānā paḌegā umr bhar

maiñ ne status kī ḳhātir kar to lī shādī magar

maiñ use shādī se pahle an-jalī kahtā rahā

niim kī Tahnī ko bhī champā-kalī kahtā rahā

misr kī kaalī ho yā ho chiin kī chipTī koī

carbon copy ko aurāq-e-jalī kahtā rahā

ek chīnī se kahā tum sharbat-e-unnāb ho

aur ik misrī ko misrī kī Dalī kahtā rahā

ek pasta-qad thī jis ko padmanī kahtā thā maiñ

bint-e-africa ko hiire kī kanī kahtā thā maiñ

merī majbūrī ne oḌhā thā ġhilāf-e-maslahat

zahar lagtī thī magar us ko ''honey'' kahtā thā maiñ

us ke ḳharrāToñ ko fitrī bāñkpan kahnā paḌā

ful badan aurat thī jis ko gul-badan kahnā paḌā

miT ga.e the us kī tahrīroñ ke sab zer-o-zabar

maiñ ne status kī ḳhātir kar to lī shādī magar

har design har color kā āshnā rakhtī thī vo

aur talāsh-e-bar kā jaarī silsila rakhtī thī vo

ek shauhar ruus kā ik chiin kā rakhtī thī vo

apne bistar par junūbī-asia rakhtī thī vo

band mujh pe kar diye sab pyaar ke raste magar

sābiqa shauhar pe darvāza khulā rakhtī thī vo

pur-tapāk itnī ki mujh par bhūñkne ke vāste

sehn meñ apne sagān-e-ḳhush-navā rakhtī thī vo

saarī duniyā kī ḳhabar rakhtī thī ḳhud se be-ḳhabar

maiñ ne status kī ḳhātir kar to lī shādī magar

mammy daddy se judā māmūñ mamānī ke baġhair

us ke naanā bhī guzar karte the naanī ke baġhair

thā laḌakpan se use zauq-e-kutub-bīnī magar

zinda rahtī thī kitāb-e-āsmānī ke baġhair

us na.ī biivī meñ aisā maġhribī andāz thā

din mire ārām se guzre purānī ke baġhair

vo bhī kuchh urdu meñ kar letī thī Tāmak-Toiyyāñ

maiñ bhī english bol letā thā ravānī ke baġhair

mujh se kahtī thī safā.ī nisf īmāñ hai magar

rest-rōm uTh kar chalī jaatī thī paanī ke baġhair

vāqif-e-atlantic thī be-niyāz-e-ḳhushk-o-tar

maiñ ne status kī ḳhātir kar to lī shādī magar

main ne status ki KHatir kar to li shadi magar

mashriqi shauhar ko din mein aa gae tare nazar

naw jo mujh ko mili zinda tha is ka naKHuda

meri manzur-e-nazar pahle se thi shadi-shuda

bar-banae-maslahat mujh ko hasin lagti thi wo

thi citizen aur kahin se zan nahin lagti thi wo

aaise aaise gul khilae us but-e-gulfam ne

murgh ko ullu bana deti thi mere samne

kya pata tha mujh ko pachhtana paDega umr bhar

main ne status ki KHatir kar to li shadi magar

main use shadi se pahle an-jali kahta raha

nim ki Tahni ko bhi champa-kali kahta raha

misr ki kali ho ya ho chin ki chipTi koi

carbon copy ko auraq-e-jali kahta raha

ek chini se kaha tum sharbat-e-unnab ho

aur ek misri ko misri ki Dali kahta raha

ek pasta-qad thi jis ko padmani kahta tha main

bint-e-africa ko hire ki kani kahta tha main

meri majburi ne oDha tha ghilaf-e-maslahat

zahar lagti thi magar us ko honey kahta tha main

us ke KHarraTon ko fitri bankpan kahna paDa

ful badan aurat thi jis ko gul-badan kahna paDa

miT gae the us ki tahriron ke sab zer-o-zabar

main ne status ki KHatir kar to li shadi magar

har design har color ka aashna rakhti thi wo

aur talash-e-bar ka jari silsila rakhti thi wo

ek shauhar rus ka ek chin ka rakhti thi wo

apne bistar par junubi-asia rakhti thi wo

band mujh pe kar diye sab pyar ke raste magar

sabiqa shauhar pe darwaza khula rakhti thi wo

pur-tapak itni ki mujh par bhunkne ke waste

sehn mein apne sagan-e-KHush-nawa rakhti thi wo

sari duniya ki KHabar rakhti thi KHud se be-KHabar

main ne status ki KHatir kar to li shadi magar

mammy daddy se juda mamun mamani ke baghair

us ke nana bhi guzar karte the nani ke baghair

tha laDakpan se use zauq-e-kutub-bini magar

zinda rahti thi kitab-e-asmani ke baghair

us nai biwi mein aisa maghribi andaz tha

din mere aaram se guzre purani ke baghair

wo bhi kuchh urdu mein kar leti thi Tamak-Toiyyan

main bhi english bol leta tha rawani ke baghair

mujh se kahti thi safai nisf iman hai magar

rest-room uTh kar chali jati thi pani ke baghair

waqif-e-atlantic thi be-niyaz-e-KHushk-o-tar

main ne status ki KHatir kar to li shadi magar