subh-e-judai

ab dhundlī paḌtī jaatī hai tārīki-e-shab maiñ jaatā huuñ

vo sub.h kā taarā ubhrā vo pau phūTī ab maiñ jaatā huuñ

jaatā huuñ ijāzat jaane do vo dekho ujāle chhāne ko haiñ

sūraj kī sunahrī kirnoñ ke ḳhāmosh bulāve aane ko haiñ

vo phūloñ ke gajre jo tum kal shaam piro kar laa.ī thiiñ

vo kaliyāñ jin se tum ne ye rañgīñ sījeñ mahkā.ī thiiñ

dekho in baasī kaliyoñ kī pattī pattī murjhā.ī hai

vo raat suhānī biit chukī aa pahuñchī sub.h-e-judā.ī hai

ab mujh ko yahāñ se jaanā hai pur-shauq nigāho mat roko

o mere gale meñ laTkī huī lachkīlī baaho mat roko

in uljhī uljhī zulfoñ meñ dil apnā bisāre jaatā huuñ

in mīThī mīThī nazroñ kī yādoñ ke sahāre jaatā huuñ

jaatā huuñ ijāzat vo dekho ġhurfe se shuā.eñ jhalkī haiñ

pighle hue sone kī lahreñ mīnā-e-shafaq se chhalkī haiñ

khetoñ meñ kisī charvāhe ne bansī kī taan uḌaa.ī hai

ek ek rasīlī sur jis kī paiġhām safar kā laa.ī hai

majbūr huuñ maiñ jaanā jo huā dil maane na maane jaatā huuñ

duniyā kī añdherī ghāTī meñ ab Thokareñ khāne jaatā huuñ

ab dhundli paDti jati hai tariki-e-shab main jata hun

wo subh ka tara ubhra wo pau phuTi ab main jata hun

jata hun ijazat jaane do wo dekho ujale chhane ko hain

suraj ki sunahri kirnon ke KHamosh bulawe aane ko hain

wo phulon ke gajre jo tum kal sham piro kar lai thin

wo kaliyan jin se tum ne ye rangin sijen mahkai thin

dekho in basi kaliyon ki patti patti murjhai hai

wo raat suhani bit chuki aa pahunchi subh-e-judai hai

ab mujh ko yahan se jaana hai pur-shauq nigaho mat roko

o mere gale mein laTki hui lachkili baho mat roko

in uljhi uljhi zulfon mein dil apna bisare jata hun

in miThi miThi nazron ki yaadon ke sahaare jata hun

jata hun ijazat wo dekho ghurfe se shuaen jhalki hain

pighle hue sone ki lahren mina-e-shafaq se chhalki hain

kheton mein kisi charwahe ne bansi ki tan uDai hai

ek ek rasili sur jis ki paigham safar ka lai hai

majbur hun main jaana jo hua dil mane na mane jata hun

duniya ki andheri ghaTi mein ab Thokaren khane jata hun