subh-e-kazib

ye jo ik nuur kī halkī sī kiran phūTī hai

kaun kahtā hai ise sub.h-e-daraḳhshāñ ai dost

mujh ko ehsās hai baaqī hai shab-e-tār bhī

lekin ai dost mujhe raqs to kar lene de

kam se kam nuur ne ulTā to hai ik baar naqāb

ek lamhe ko to TuuTā hai tilism-e-shab-e-tār

is se sābit to huā sub.h bhī ho saktī hai

parda-e-zulmat-e-shab chaak bhī ho saktā hai

sub.h-e-kāzib bhī to hai asl meñ dībācha-e-sub.h

sub.h-e-kāzib bhī to hai sub.h-e-daraḳhshāñ kī naved

ek elaan ki hañgām-e-vidā-e-shab hai

qāfila nūr-e-sahar kā hai bahut hī nazdīk

jald hone ko hai ḳhurshīd-e-daraḳhshāñ kī numūd

ye jo ek nur ki halki si kiran phuTi hai

kaun kahta hai ise subh-e-daraKHshan ai dost

mujh ko ehsas hai baqi hai shab-e-tar bhi

lekin ai dost mujhe raqs to kar lene de

kam se kam nur ne ulTa to hai ek bar naqab

ek lamhe ko to TuTa hai tilism-e-shab-e-tar

is se sabit to hua subh bhi ho sakti hai

parda-e-zulmat-e-shab chaak bhi ho sakta hai

subh-e-kazib bhi to hai asl mein dibacha-e-subh

subh-e-kazib bhi to hai subh-e-daraKHshan ki nawed

ek elan ki hangam-e-wida-e-shab hai

qafila nur-e-sahar ka hai bahut hi nazdik

jald hone ko hai KHurshid-e-daraKHshan ki numud