subh-e-sadiq

rah gayā raah meñ jab kuchh bhī na kāñToñ ke sivā

tīrgī jhuuT kī jab chhā ga.ī sachchā.ī par

ufuq-e-zinda-o-pā.inda-e-nankāna se

hañs paḌī ek kiran vaqt kī tanhā.ī par

dil ke sunsān khañDar meñ koī naġhma jaagā

aañkh maltī huī ik sub.h bayābāñ se uThī

fikr āzād huī zehn ke jaale TuuTe

aur īqān kī lau sīnā-e-insāñ se uThī

zahr meñ Duub ga.ī thiiñ jo zabāneñ yaksar

un pe shīrīnī-e-vahdat ke tarāne aa.e

jism martā hai magar ruuh kahāñ martī hai

ruuh ik nuur hai aur jism thirakte saa.e

jism kāñToñ se guzartā hai guzar jaane do

ruuh vo phuul hai jis par na ḳhizāñ aa.egī

ruuh pī legī jo irfān-o-mohabbat kī sharāb

mastī-o-kaif hamesha ke liye pā.egī

pīr-e-nañgāna tirī rūh-e-sadāqat ko salām

jāvedāñ parcham-e-ulfat tirā lahrātā hai

rah gaya rah mein jab kuchh bhi na kanTon ke siwa

tirgi jhuT ki jab chha gai sachchai par

ufuq-e-zinda-o-painda-e-nankana se

hans paDi ek kiran waqt ki tanhai par

dil ke sunsan khanDar mein koi naghma jaga

aankh malti hui ek subh bayaban se uThi

fikr aazad hui zehn ke jale TuTe

aur iqan ki lau sina-e-insan se uThi

zahr mein Dub gai thin jo zabanen yaksar

un pe shirini-e-wahdat ke tarane aae

jism marta hai magar ruh kahan marti hai

ruh ek nur hai aur jism thirakte sae

jism kanTon se guzarta hai guzar jaane do

ruh wo phul hai jis par na KHizan aaegi

ruh pi legi jo irfan-o-mohabbat ki sharab

masti-o-kaif hamesha ke liye paegi

pir-e-nangana teri ruh-e-sadaqat ko salam

jawedan parcham-e-ulfat tera lahraata hai