subh-e-shab-e-intizar

yahī vo manzil-e-maqsūd hai ki jis ke liye

baḌe hī azm se apne safar pe nikle the

isī ghaḌī kī tamanna meñ jaane kitne log

jo be-ḳhatā the magar sūliyoñ pe laTke the

ye sochte the ki vo din kabhī to aa.egā

tamām hasrateñ dil kī nikal hī jā.eñgī

hamāre paañv kī ye beḌiyāñ ye zanjīreñ

kabhī to mom kī sūrat pighal hī jā.eñgī

kuchh is tarah se baḌhā dil meñ zauq-e-āzādī

ki rafta rafta tamanna javān hotī ga.ī

kuchh is tarah se uThī har taraf se vo āñdhī

jo uThte uThte ḳhud ik āsmān hotī ga.ī

nigāh ko thī magar mīr-e-kārvāñ kī talāsh

nazar jo uTThī to dekhā ki ek mard-e-faqīr

khaḌā hai hausla-e-amn-o-āshatī le kar

na koī ḳhod badan par na haath meñ shamshīr

charāġh raah meñ us ke amal se jalne lage

lo aaj sub.h-e-shab-e-intizār aa hī ga.ī

fazā mahakne lagī dil-navāz phūloñ se

dayār-e-hind meñ fasl-e-bahār aa hī ga.ī

yahi wo manzil-e-maqsud hai ki jis ke liye

baDe hi azm se apne safar pe nikle the

isi ghaDi ki tamanna mein jaane kitne log

jo be-KHata the magar suliyon pe laTke the

ye sochte the ki wo din kabhi to aaega

tamam hasraten dil ki nikal hi jaengi

hamare panw ki ye beDiyan ye zanjiren

kabhi to mom ki surat pighal hi jaengi

kuchh is tarah se baDha dil mein zauq-e-azadi

ki rafta rafta tamanna jawan hoti gai

kuchh is tarah se uThi har taraf se wo aandhi

jo uThte uThte KHud ek aasman hoti gai

nigah ko thi magar mir-e-karwan ki talash

nazar jo uTThi to dekha ki ek mard-e-faqir

khaDa hai hausla-e-amn-o-ashati le kar

na koi KHod badan par na hath mein shamshir

charagh rah mein us ke amal se jalne lage

lo aaj subh-e-shab-e-intizar aa hi gai

faza mahakne lagi dil-nawaz phulon se

dayar-e-hind mein fasl-e-bahaar aa hi gai