subh-e-watan

vo jalva sahar kā vo chiḌiyoñ kā gaanā

vo ThanDī havā.eñ vo manzar suhānā

vo phūloñ kā khilnā vo bū bhīnī-bhīnī

masarrat se kaliyoñ kā vo muskurānā

ufuq par vo surḳhī vo rangīn bādal

vo pūrab meñ sūraj kā jalva dikhānā

daraḳhtoñ kā vo jhūmnā mast ho kar

vo pattoñ kā ḳhush ho ke taalī bajānā

ḳhudā ke vo bandoñ kā bedār honā

vo muñh haath dhonā vo un kā nahānā

vo phir kaam meñ apne masrūf rah kar

mashaqqat se mehnat se rozī kamānā

vo bailoñ ke ghuñgrū vo Tan Tan suhānī

kisānoñ kā uTh kar vo khetoñ meñ jaanā

vo sarsabz khetoñ ke dilkash nazāre

vo shādāb khetī kā manzar suhānā

vo ek ek bastī ke ghar ghar meñ raunaq

vo jhāḌū buhārū vo khānā pakānā

vo āzād rahne kī dil se duā.eñ

vatan kī mohabbat ke vo giit gaanā

nirālī haiñ yuuñ to fazā.eñ vatan kī

magar is kā vaqt-e-sahar hai yagāna

chalo ham bhī 'nayyar' kā ik giit gaa.eñ

vahī ya.anī apne vatan kā tarāna

wo jalwa sahar ka wo chiDiyon ka gana

wo ThanDi hawaen wo manzar suhana

wo phulon ka khilna wo bu bhini-bhini

masarrat se kaliyon ka wo muskurana

ufuq par wo surKHi wo rangin baadal

wo purab mein suraj ka jalwa dikhana

daraKHton ka wo jhumna mast ho kar

wo patton ka KHush ho ke tali bajaana

KHuda ke wo bandon ka bedar hona

wo munh hath dhona wo un ka nahana

wo phir kaam mein apne masruf rah kar

mashaqqat se mehnat se rozi kamana

wo bailon ke ghungru wo Tan Tan suhani

kisanon ka uTh kar wo kheton mein jaana

wo sarsabz kheton ke dilkash nazare

wo shadab kheti ka manzar suhana

wo ek ek basti ke ghar ghar mein raunaq

wo jhaDu buhaaru wo khana pakana

wo aazad rahne ki dil se duaen

watan ki mohabbat ke wo git gana

nirali hain yun to fazaen watan ki

magar is ka waqt-e-sahar hai yagana

chalo hum bhi 'nayyar' ka ek git gaen

wahi yani apne watan ka tarana