subh ka saman

ik latāfat ik tarannum ik asar hai dekhiye

rūh-parvar jāñ-fazā lutf-e-sahar hai dekhiye

qatra-e-shabnam har ik ashk-e-guhar hai dekhiye

kaif-āgīñ hai jo manzar jalva-gar hai dekhiye

nisf aalam meñ tarab-zā daur ik maujūd hai

be-ḳhudī chāroñ taraf chhā.ī hai rangīñ hai chaman

jhūmte haiñ lahlahāte haiñ gul-o-sarv-o-saman

āsmāñ par surḳhī-e-gulgūñ kī hai aisī phaban

dekh kar be-sāḳhta hotā hai dil behad magan

har taraf ik jalva-e-shādāb-e-hast-o-būd hai

ab parinde bhī lage par tolne vaqt-e-sahar

jānib-e-sahrā huā chaupāyoñ kā āḳhir guzar

aur vo dahqāñ sadā piite jo haiñ ḳhūn-e-jigar

kaam meñ mashġhūl apne ho ga.e haiñ sar-basar

shaad hai dil un kā aur behad tarab-ālūd hai

rind-e-bāda-nosh haiñ aur vā dar-e-mai-ḳhāna hai

koī hai hushiyār in meñ to koī dīvāna hai

dāna-e-angūr hai tasbīh kā jo daana hai

aur subūhī se bharā yuuñ mehr kā paimāna hai

pārsā.ī shaiḳh kī is vaqt sab mafqūd hai

vo masājid kī azaañ dil sab ke taḌpāne lagī

but-kade meñ phir mohabbat dil ko garmāne lagī

husn kī dil meñ aqīdat josh sikhlāne lagī

raam aur rahmān kī dilkash sadā aane lagī

ye sadā 'ījād' goyā naġhma-e-dā.ūd hai

ek latafat ek tarannum ek asar hai dekhiye

ruh-parwar jaan-faza lutf-e-sahar hai dekhiye

qatra-e-shabnam har ek ashk-e-guhar hai dekhiye

kaif-agin hai jo manzar jalwa-gar hai dekhiye

nisf aalam mein tarab-za daur ek maujud hai

be-KHudi chaaron taraf chhai hai rangin hai chaman

jhumte hain lahlahate hain gul-o-sarw-o-saman

aasman par surKHi-e-gulgun ki hai aisi phaban

dekh kar be-saKHta hota hai dil behad magan

har taraf ek jalwa-e-shadab-e-hast-o-bud hai

ab parinde bhi lage par tolne waqt-e-sahar

jaanib-e-sahra hua chaupayon ka aaKHir guzar

aur wo dahqan sada pite jo hain KHun-e-jigar

kaam mein mashghul apne ho gae hain sar-basar

shad hai dil un ka aur behad tarab-alud hai

rind-e-baada-nosh hain aur wa dar-e-mai-KHana hai

koi hai hushiyar in mein to koi diwana hai

dana-e-angur hai tasbih ka jo dana hai

aur subuhi se bhara yun mehr ka paimana hai

parsai shaiKH ki is waqt sab mafqud hai

wo masajid ki azan dil sab ke taDpane lagi

but-kade mein phir mohabbat dil ko garmane lagi

husn ki dil mein aqidat josh sikhlane lagi

ram aur rahman ki dilkash sada aane lagi

ye sada 'ijad' goya naghma-e-daud hai