subh

sub.h hone lagī hai

magar apne bistar meñ vo be-ḳhabar ab bhī be-sudh paḌī hai

use kyā ḳhabar hai

ki do laakh sāloñ se chaltī huī

andromeda ke kuchh sūrajoñ kī shuā.eñ

zamīñ par pahuñch kar hamārī shuāoñ meñ shāmil huī haiñ

to is sub.h kā chehra raushan huā hai

ye do laakh sāloñ kā lambā safar

jis meñ ham sapiens

jangaloñ ke añdheroñ meñ baḌhte hue

apne cousinoñ kī qismat ke rab ban ga.e

un se itnā laḌe

un kī nāpaidgī kā sabab ban ga.e

itne sāloñ meñ ham

ġhaar se jhoñpḌī jhoñpḌī se qabīloñ kī sūrat baTe

aur qabīloñ se shahroñ meñ Dhalne lage haiñ

ye do laakh sāloñ se niklī huī raushnī apne sūraj meñ aa kar milī hai

to duniyā kī ain us jagah par jahāñ is kā ghar hai

vahāñ

sub.h banñe lagī hai

zamīñ par kisī din kī pahlī ghaḌī hai

zamīñ ghuum kar apne baabā kī jānib muḌī hai

magar apne bistar meñ vo be-ḳhabar ab bhī be-sudh paḌī hai

subh hone lagi hai

magar apne bistar mein wo be-KHabar ab bhi be-sudh paDi hai

use kya KHabar hai

ki do lakh salon se chalti hui

andromeda ke kuchh surajon ki shuaen

zamin par pahunch kar hamari shuaon mein shamil hui hain

to is subh ka chehra raushan hua hai

ye do lakh salon ka lamba safar

jis mein hum sapiens

jangalon ke andheron mein baDhte hue

apne cousinon ki qismat ke rab ban gae

un se itna laDe

un ki napaidgi ka sabab ban gae

itne salon mein hum

ghaar se jhonpDi jhonpDi se qabilon ki surat baTe

aur qabilon se shahron mein Dhalne lage hain

ye do lakh salon se nikli hui raushni apne suraj mein aa kar mili hai

to duniya ki ain us jagah par jahan is ka ghar hai

wahan

subh banne lagi hai

zamin par kisi din ki pahli ghaDi hai

zamin ghum kar apne baba ki jaanib muDi hai

magar apne bistar mein wo be-KHabar ab bhi be-sudh paDi hai