subhash-chandr-bos bahadur-shah-zafar ke mazar par

assalām ai azmat-e-hindostāñ kī yādgār

ai shahanshāh-e-dayār-e-dil faqīr-e-be-dayār

aaj pahlī baar terī qabr par aayā huuñ maiñ

be-navā huuñ nazr ko be-laus dil laayā huuñ maiñ

gardish-e-taqdīr ke hāthoñ vatan se duur huuñ

ek bulbul huuñ magar sehn-e-chaman se duur huuñ

shauq āzādī kā mujh ko khīñch laayā hai yahāñ

aaj dushman hai zamīñ merī adū hai āsmāñ

maiñ bhī huuñ apne vatan se duur tū bhī duur hai

haañ razā-e-pāk-e-yazdāñ ko yahī manzūr hai

merā dāman bhī yahāñ kī ḳhaak se ālūda hai

farq sirf itnā hai maiñ āvāra tū āsūda hai

ai shah-e-ḳhvābīda ai taqdīr-e-bedār-e-vatan

aa.ina merī nigāhoñ par hai o bār-e-vatan

mere dil ko yaad hai ab tak vo sattāvan kī jang

jis ke baa'd is sarzamīñ pe chhā ga.e ahal-e-farañg

merī nazroñ meñ hai meraTh aur dehlī kā zavāl

jāntā huuñ maiñ jo thā jhāñsī kī raanī kā ma.aal

maiñ nahīñ bhūlā abhī anjām-e-nānā-farnavīs

hai nazar meñ koshish-e-nākām-e-nānā-farnavīs

dāstāñ jaise bhī ho guzrī vo sab mālūm hai

tere dil-bandoñ pe jo guzrī vo sab mālūm hai

ye vatan rauñdā hai jis ko muddatoñ aġhyār ne

jis pe Dhaa.e zulm lākhoñ charḳh-e-nā-hanjār ne

jis ko rakkhā muddatoñ qismat ne zillat-āshnā

jis ne har pahlū meñ dekhī pastiyoñ kī intihā

aaj phir us mulk meñ ik zindagī kī lahr hai

ḳhaak se aflāk tak tābindagī kī lahr hai

aaj phir is mulk ke lākhoñ javāñ bedār haiñ

hurriyat kī raah meñ miTne ko jo tayyār haiñ

aaj phir hai be-niyām is mulk kī shamshīr dekh

sone vaale jaag apne ḳhvāb kī ta.abīr dekh

is tarah larze meñ hai buniyād-e-aivān-e-farañg

khā chuke haiñ maat goyā shīsha-bāzān-e-farañg

hubb-e-qaumī ke tarānoñ se havā labrez hai

aur topoñ kī danā-dan se fazā labrez hai

shor gīr-o-dār kā hai phir fazāoñ meñ buland

aaj phir himmat ne pheñkī hai sitāroñ par kamand

phir umangeñ ārzūeñ haiñ diloñ meñ be-qarār

qaum ko yaad aa gayā hai apnā gum-gashta vaqār

naujavānoñ ke diloñ meñ sarfaroshī kī umang

ishq baazī le gayā hai aql bechārī hai dañg

aaj phir is des meñ jhankār talvāroñ kī hai

kuchh nirālī kaifiyat phir des ke pyāroñ kī hai

jo tavānā.ī irādoñ meñ hai kohsāroñ kī hai

zarre zarre meñ nihāñ tābindagī tāroñ kī hai

ye nazāra aah lafzoñ meñ samā saktā nahīñ

aañkh jo kuchh dekhtī hai lab pe aa saktā nahīñ

fat.h-e-nusrat kī duāoñ se huā ma.amūr hai

nārā-e-jai-hind se saarī fazā ma.amūr hai

mujh ko ai shāh-e-vatan apne irādoñ kī qasam

jin ke sar kaaTe ga.e in shāh-zādoñ kī qasam

tere marqad kī muqaddas ḳhaak kī mujh ko qasam

maiñ jahāñ huuñ us fazā-e-pāk kī mujh ko qasam

apne bhūke jāñ-ba-lab bangāl kī mujh ko qasam

hākimoñ ke dast-parvar kaal kī mujh ko qasam

lāl-qile ke zavāl o shahr-e-dehlī kī qasam

mohsin-e-dehlī ma.āl-e-shahr-e-dehlī kī qasam

maiñ tirī khoī huī azmat ko vāpas lā.ūñgā

aur tire marqad pe nusrat-yāb ho kar ā.ūñgā

teġh-e-hindī jis kā lohā māntā hai ik jahāñ

jis kī tezī kī gavāhī de rahā hai āsmāñ

teġh-e-hindī jis ko maiñ ne kar diyā hai be-niyām

jis kā sheva hurriyat-keshī jahāñgīrī hai kaam

jis ne puurī munsifī kī aaj tak duniyā ke saath

zulm kī dushman hai jo ik zulm-e-be-parda ke saath

har qadam par jis ne bātil ko milāyā ḳhaak meñ

jis ke sākhoñ kī abhī tak guuñj hai aflāk meñ

aaj phir apnī nazar jis kī chamak se ḳhīra hai

jis kī tābānī se raushan ik jahān-e-tīrā hai

ik jazīre ke hasīñ sāhil se jab Takrā.egī

chain se mujh ko bhaḌaktī aag meñ niiñd aa.egī

assalam ai azmat-e-hindostan ki yaadgar

ai shahanshah-e-dayar-e-dil faqir-e-be-dayar

aaj pahli bar teri qabr par aaya hun main

be-nawa hun nazr ko be-laus dil laya hun main

gardish-e-taqdir ke hathon watan se dur hun

ek bulbul hun magar sehn-e-chaman se dur hun

shauq aazadi ka mujh ko khinch laya hai yahan

aaj dushman hai zamin meri adu hai aasman

main bhi hun apne watan se dur tu bhi dur hai

han raza-e-pak-e-yazdan ko yahi manzur hai

mera daman bhi yahan ki KHak se aaluda hai

farq sirf itna hai main aawara tu aasuda hai

ai shah-e-KHwabida ai taqdir-e-bedar-e-watan

aaina meri nigahon par hai o bar-e-watan

mere dil ko yaad hai ab tak wo sattawan ki jang

jis ke ba'd is sarzamin pe chha gae ahal-e-farang

meri nazron mein hai meraTh aur dehli ka zawal

jaanta hun main jo tha jhansi ki rani ka maal

main nahin bhula abhi anjam-e-nana-farnawis

hai nazar mein koshish-e-nakaam-e-nana-farnawis

dastan jaise bhi ho guzri wo sab malum hai

tere dil-bandon pe jo guzri wo sab malum hai

ye watan raunda hai jis ko muddaton aghyar ne

jis pe Dhae zulm lakhon charKH-e-na-hanjar ne

jis ko rakkha muddaton qismat ne zillat-ashna

jis ne har pahlu mein dekhi pastiyon ki intiha

aaj phir us mulk mein ek zindagi ki lahr hai

KHak se aflak tak tabindagi ki lahr hai

aaj phir is mulk ke lakhon jawan bedar hain

hurriyat ki rah mein miTne ko jo tayyar hain

aaj phir hai be-niyam is mulk ki shamshir dekh

sone wale jag apne KHwab ki tabir dekh

is tarah larze mein hai buniyaad-e-aiwan-e-farang

kha chuke hain mat goya shisha-bazan-e-farang

hubb-e-qaumi ke taranon se hawa labrez hai

aur topon ki dana-dan se faza labrez hai

shor gir-o-dar ka hai phir fazaon mein buland

aaj phir himmat ne phenki hai sitaron par kamand

phir umangen aarzuen hain dilon mein be-qarar

qaum ko yaad aa gaya hai apna gum-gashta waqar

naujawanon ke dilon mein sarfaroshi ki umang

ishq bazi le gaya hai aql bechaari hai dang

aaj phir is des mein jhankar talwaron ki hai

kuchh nirali kaifiyat phir des ke pyaron ki hai

jo tawanai iradon mein hai kohsaron ki hai

zarre zarre mein nihan tabindagi taron ki hai

ye nazara aah lafzon mein sama sakta nahin

aankh jo kuchh dekhti hai lab pe aa sakta nahin

fath-e-nusrat ki duaon se hua mamur hai

nara-e-jai-hind se sari faza mamur hai

mujh ko ai shah-e-watan apne iradon ki qasam

jin ke sar kaTe gae in shah-zadon ki qasam

tere marqad ki muqaddas KHak ki mujh ko qasam

main jahan hun us faza-e-pak ki mujh ko qasam

apne bhuke jaan-ba-lab bangal ki mujh ko qasam

hakimon ke dast-parwar kal ki mujh ko qasam

lal-qile ke zawal o shahr-e-dehli ki qasam

mohsin-e-dehli maal-e-shahr-e-dehli ki qasam

main teri khoi hui azmat ko wapas launga

aur tere marqad pe nusrat-yab ho kar aaunga

tegh-e-hindi jis ka loha manta hai ek jahan

jis ki tezi ki gawahi de raha hai aasman

tegh-e-hindi jis ko main ne kar diya hai be-niyam

jis ka shewa hurriyat-keshi jahangiri hai kaam

jis ne puri munsifi ki aaj tak duniya ke sath

zulm ki dushman hai jo ek zulm-e-be-parda ke sath

har qadam par jis ne baatil ko milaya KHak mein

jis ke sakhon ki abhi tak gunj hai aflak mein

aaj phir apni nazar jis ki chamak se KHira hai

jis ki tabani se raushan ek jahan-e-tira hai

ek jazire ke hasin sahil se jab Takraegi

chain se mujh ko bhaDakti aag mein nind aaegi