suKHnawar

suḳhnavaro

mere ham-asro

merī umr ke shā.iro

koī to aisī ġhazal kaho

koī to aisī nazm likho

jise sun kar tumhāre shā.ir hone kā subūt mile

tumheñ zī-fahm hone kā ḳhitāb mile

kabhī to ḳhāliq the aaj maḳhlūq haiñ ham

kabhī to hākim the aaj mahkūm haiñ ham

kabhī to qātil the aaj maslūb haiñ ham

'ġhālib'-o-'mīr' ne ishq-e-butāñ par apnī nazar rakkhī

iqbāl ne qadmoñ ke tale

qātil kī zabāñ rakkhī

taraqqī pasandoñ ne mazdūr ke hisār buland kiye

ḳhud to rahe buland-bāñg mahloñ meñ

jhoñpaḌiyoñ ke fasāne tahrīr kiye

jadīdiyat kā taqāzā hai dard-o-ġham zaat

tanhā.ī bebasī alamnākī

uktā.e hue log

na mohabbat na sukūn na dostī na dushmanī

na kahīñ qarār

har sū zindagī se farār

yahī mazāmīn-e-nau haiñ

mere ahd ke qalam-kāro

tum in pe bhī apnī nazar rakkho

likho hikāyāt-e-ḳhūñ-chakāñ

varna ḳhud ko shā.ir na kaho

apne hāthoñ se qalam rakh do

suKHnawaro

mere ham-asro

meri umr ke shairo

koi to aisi ghazal kaho

koi to aisi nazm likho

jise sun kar tumhaare shair hone ka subut mile

tumhein zi-fahm hone ka KHitab mile

kabhi to KHaliq the aaj maKHluq hain hum

kabhi to hakim the aaj mahkum hain hum

kabhi to qatil the aaj maslub hain hum

'ghaalib'-o-'mir' ne ishq-e-butan par apni nazar rakkhi

iqbaal ne qadmon ke tale

qatil ki zaban rakkhi

taraqqi pasandon ne mazdur ke hisar buland kiye

KHud to rahe buland-bang mahlon mein

jhonpaDiyon ke fasane tahrir kiye

jadidiyat ka taqaza hai dard-o-gham zat

tanhai bebasi alamnaki

uktae hue log

na mohabbat na sukun na dosti na dushmani

na kahin qarar

har su zindagi se farar

yahi mazamin-e-nau hain

mere ahd ke qalam-karo

tum in pe bhi apni nazar rakkho

likho hikayat-e-KHun-chakan

warna KHud ko shair na kaho

apne hathon se qalam rakh do