sukun-bhari maut

koī

shikāyat

nahīñ karūñgā

kabhī ḳhudā se

vo

zindagī meñ

hazār dukh de

har ek lamhe meñ

ranj rakh de

vajūd saarā

ġhamoñ se bhar de

har ek

sapne ko chuur kar de

qubūl hai sab

magar

vo merī bhī

is duā

ko qubūl kar le

ki

maut de jab

to is tarah de

ki chalte-phirte

badan se mere nikāle mujh ko

maiñ apne bistar pe barsoñ paḌ ke nahīñ marūñgā

kisī ke

kāñdhe pe

bojh ban kar nahīñ chaḌhūñgā

kisī ke

siine meñ

ban ke uljhan nahīñ rahūñgā

kisī ke

ehsān

merī miTTī meñ

cactus ban nahīñ ugeñge

mujhe ye kāñTe nahīñ chubheñge

na

apne ghar

aur

aspatāloñ

ke darmiyāñ

maiñ safar karūñgā

na goliyoñ

par basar karūñgā

na roz

plaToñ meñ

rakh ke parhez khā sakūñgā

mirī

samā.at

kisī ke ta.ane nahīñ sunegī

na mere

zaḳhmoñ se

makkhiyoñ ko ġhizā milegī

kabhī na aisī sazā milegī

kisī kī

ḳhushiyoñ ke

chāñd par maiñ

gahan banā to burā lagegā

maiñ ghar ke

kone meñ

zindagī bhar

paḌā rahā to burā lagegā

ye

chāñd

sūraj bhī

dekhne ko taras gayā to burā lagegā

yahī

duā hai

ḳhudā se be-shak

hayāt mujh ko vo muḳhtasar de

magar marūñ to

mire badan meñ

vo ruuh le kar sukūn bhar de

maiñ apne bistar pe barsoñ paḌ ke nahīñ marūñgā

koi

shikayat

nahin karunga

kabhi KHuda se

wo

zindagi mein

hazar dukh de

har ek lamhe mein

ranj rakh de

wajud sara

ghamon se bhar de

har ek

sapne ko chur kar de

qubul hai sab

magar

wo meri bhi

is dua

ko qubul kar le

ki

maut de jab

to is tarah de

ki chalte-phirte

badan se mere nikale mujh ko

main apne bistar pe barson paD ke nahin marunga

kisi ke

kandhe pe

bojh ban kar nahin chaDhunga

kisi ke

sine mein

ban ke uljhan nahin rahunga

kisi ke

ehsan

meri miTTi mein

cactus ban nahin ugenge

mujhe ye kanTe nahin chubhenge

na

apne ghar

aur

aspatalon

ke darmiyan

main safar karunga

na goliyon

par basar karunga

na roz

plaTon mein

rakh ke parhez kha sakunga

meri

samaat

kisi ke tane nahin sunegi

na mere

zaKHmon se

makkhiyon ko ghiza milegi

kabhi na aisi saza milegi

kisi ki

KHushiyon ke

chand par main

gahan bana to bura lagega

main ghar ke

kone mein

zindagi bhar

paDa raha to bura lagega

ye

chand

suraj bhi

dekhne ko taras gaya to bura lagega

yahi

dua hai

KHuda se be-shak

hayat mujh ko wo muKHtasar de

magar marun to

mere badan mein

wo ruh le kar sukun bhar de

main apne bistar pe barson paD ke nahin marunga