sukun-e-tanhai

kunj-e-tanhā.ī meñ ham aise pareshāñ bhī nahiñ

koī mahrūmī-e-yārāñ bhī nahīñ

tere jaane se akelā to huā huuñ lekin

tere jaane se mirā dard farozāñ bhī nahīñ

tū ne chhoḌā to zamāne se bhī rishta TuuTā

ishq kā ġham hai koī ab ġham-e-daurāñ bhī nahīñ

dil ko samjhātā huuñ karte ho shikāyat kis se

mehrbāñ hogā koī is kā ab imkāñ bhī nahīñ

ghar kī ḳhāmoshī fazāoñ meñ udāsī hai magar

is udāsī meñ koī vahshat-e-vīrāñ bhī nahīñ

tū jo aayā mirī duniyā meñ talātum aayā

tū nahīñ hai to mirā chaak garebāñ bhī nahīñ

kaisī takrār hai hujjat hai shikāyat kaisī

is kahānī meñ koī zūd-pashemāñ bhī nahīñ

bā.is-e-dard huī qurbat-e-yārāñ aksar

ab mujhe ārzū-e-sohbat-e-jānāñ bhī nahīñ

phir se karnā hai safar mujh ko na.ī rāhoñ par

na.ī manzil ke liye rāh-e-gulistāñ bhī nahīñ

tere hī dām-e-mohabbat meñ giraftār rahā

mahfil-e-ġhair meñ ummīd-e-mehrbāñ bhī nahīñ

tajraboñ ne ye sikhāyā hai ki hastī meñ 'amīr'

marham-e-zaḳhm nahīñ dard kā darmāñ bhī nahīñ

kunj-e-tanhai mein hum aise pareshan bhi nahin

koi mahrumi-e-yaran bhi nahin

tere jaane se akela to hua hun lekin

tere jaane se mera dard farozan bhi nahin

tu ne chhoDa to zamane se bhi rishta TuTa

ishq ka gham hai koi ab gham-e-dauran bhi nahin

dil ko samjhata hun karte ho shikayat kis se

mehrban hoga koi is ka ab imkan bhi nahin

ghar ki KHamoshi fazaon mein udasi hai magar

is udasi mein koi wahshat-e-viran bhi nahin

tu jo aaya meri duniya mein talatum aaya

tu nahin hai to mera chaak gareban bhi nahin

kaisi takrar hai hujjat hai shikayat kaisi

is kahani mein koi zud-pasheman bhi nahin

bais-e-dard hui qurbat-e-yaran aksar

ab mujhe aarzu-e-sohbat-e-jaanan bhi nahin

phir se karna hai safar mujh ko nai rahon par

nai manzil ke liye rah-e-gulistan bhi nahin

tere hi dam-e-mohabbat mein giraftar raha

mahfil-e-ghair mein ummid-e-mehrban bhi nahin

tajrabon ne ye sikhaya hai ki hasti mein 'amir'

marham-e-zaKHm nahin dard ka darman bhi nahin