سکون

تڑپ رہے ہیں جو طوفاں مرے خیالوں میں

وہ بند ضبط و تحمل سے آ نہ ٹکرائیں

ابھر رہی ہیں جو موجیں شکست ارماں کی

وہ میرا عزم مصمم بہا نہ لے جائیں

دہن خموش زباں چپ لبوں پہ مہر سکوت

مری حیات کا مقصد ہے غم پہ غم کھائیں

خلا میں گھور رہا ہوں نقوش ماضی کو

یہ بے یقینیٔ فردا میں گم نہ ہو جائیں

خموشیوں میں یہاں ایک حشر برپا ہے

کہاں سے ڈھونڈ کے لمحات پر سکوں لائیں

جو اپنی ساری امیدوں کا خون ہو جائے

قسم سے دست ستم کو سکون ہو جائے