sun hawwa ki beTi

koī din aisā bhī aayā kyā

tum jī paa.ī ho apne liye

tum mar paa.ī ho apne liye

kabhī khul kar hañsnā sīkhā ho

kisī ḳhvāb ko chhū kar dekhā ho

jaagī ho apnī sub.hoñ meñ

kabhī soī apnī aañkh se tum

Daalī ho apnī jholī meñ

kabhī chāhat apne hisse kī

kabhī tanhā.ī ke pyāle meñ

koī lamha amrit jaisā bhī

kabhī ruuh ke sahrā meñ gūñjā

koī naam ḳhudā se pyārā bhī

kabhī zañg-ālūd kivāḌoñ par

kisī giit ne koī dastak dī

kabhī gūñge bahre lamhoñ meñ

aaseb koī ham-zād koī

kabhī dil kā bojh utārā bhī

koī din aisā bhī aayā kyā

tum jī paa.ī ho apne liye

tum mar paa.ī ho apne liye

koi din aisa bhi aaya kya

tum ji pai ho apne liye

tum mar pai ho apne liye

kabhi khul kar hansna sikha ho

kisi KHwab ko chhu kar dekha ho

jagi ho apni subhon mein

kabhi soi apni aankh se tum

Dali ho apni jholi mein

kabhi chahat apne hisse ki

kabhi tanhai ke pyale mein

koi lamha amrit jaisa bhi

kabhi ruh ke sahra mein gunja

koi nam KHuda se pyara bhi

kabhi zang-alud kiwaDon par

kisi git ne koi dastak di

kabhi gunge bahre lamhon mein

aaseb koi ham-zad koi

kabhi dil ka bojh utara bhi

koi din aisa bhi aaya kya

tum ji pai ho apne liye

tum mar pai ho apne liye