sun zara

sun zarā

maiñ ne sunā

ret kā Dher hai duniyā

yā kisī ḳhvāb kā 'aks

aur kuchh ret hai muTThī meñ mirī

reg-e-dīroz hai ye

biite hue vaqt kī ret

ret ke Dher tale ret hai madfūn mirī

ek be-nām sā katba hai nishānī merī

us Thikāne pe lage ḳhvāb Thikāne mere

sun zarā

maiñ ne sunā

log paḌhte haiñ kitābeñ merī

log kuchh log gulāboñ jaise

jin ke chehre haiñ kitābī chehre

un se kahnā ki ye merī nazmeñ

in meñ kuchh giit jo gaa.e na ga.e

aur kuchh ḳhvāb haiñ ḳhvāboñ jaise

mere kuchh ḳhvāb haiñ tahrīr-shuda

jin meñ manzūm haiñ sab ā.ina-ḳhāne mere

sun zarā

maiñ ne sunā

merī rusvā.ī ke afsānoñ meñ

vo bhī hai darj jo likkhā na gayā

jo kahā aur na sunā

jo huā yā na huā

kis ko fursat ki palaT kar dekhe

kaun ḳhvāboñ kī vazāhat chāhe

kaise guzre haiñ zamāne mere

sun zarā

maiñ ne sunā

tū bhī suntā hai fasāne mere

sun zara

main ne suna

ret ka Dher hai duniya

ya kisi KHwab ka 'aks

aur kuchh ret hai muTThi mein meri

reg-e-diroz hai ye

bite hue waqt ki ret

ret ke Dher tale ret hai madfun meri

ek be-nam sa katba hai nishani meri

us Thikane pe lage KHwab Thikane mere

sun zara

main ne suna

log paDhte hain kitaben meri

log kuchh log gulabon jaise

jin ke chehre hain kitabi chehre

un se kahna ki ye meri nazmen

in mein kuchh git jo gae na gae

aur kuchh KHwab hain KHwabon jaise

mere kuchh KHwab hain tahrir-shuda

jin mein manzum hain sab aaina-KHane mere

sun zara

main ne suna

meri ruswai ke afsanon mein

wo bhi hai darj jo likkha na gaya

jo kaha aur na suna

jo hua ya na hua

kis ko fursat ki palaT kar dekhe

kaun KHwabon ki wazahat chahe

kaise guzre hain zamane mere

sun zara

main ne suna

tu bhi sunta hai fasane mere