suno beTi

suno beTī

mujhe tum se zarūrī baat kahnī hai

tumheñ mā'lūm hai beTī

tumhārā baap shā'ir hai

ki jis ne 'umr bhar alfāz ke sikke kamā.e haiñ

vahī sikke jo is bāzār meñ chalte nahīñ jis meñ

sabhī aisī dukāneñ haiñ

jahāñ kāġhaz ke TukḌoñ ke 'evaz kuchh ḳhvāb bikte haiñ

jahāñ par beTiyoñ ke qīmtī armān bikte haiñ

suno beTī

tumhāre ḳhvāb aur armān

in lafzoñ ke sikkoñ se ḳharīde jā nahīñ sakte

jo merā kul asāsa haiñ

suno beTī

tumhārā baap shā'ir hī nahīñ mujrim bhī hai jis ne

vo sab sikke kamā.e haiñ

jo duniyā ke kisī bāzār meñ bhī chal nahīñ sakte

ḳhushī meñ Dhal nahīñ sakte

suno beTī

mirā ai kaash lafzoñ se koī rishta nahīñ hotā

maiñ manDī meñ tijārat kar ke vo kāġhaz kamātā jo

har ik armān har ik ḳhvāb kī qīmat chukā sakte

tumhārā ghar sajā sakte

dulhan tum ko banā sakte

suno beTī

mujhe tum se zarūrī baat kahnī hai

suno beTi

mujhe tum se zaruri baat kahni hai

tumhein ma'lum hai beTi

tumhaara bap sha'ir hai

ki jis ne 'umr bhar alfaz ke sikke kamae hain

wahi sikke jo is bazar mein chalte nahin jis mein

sabhi aisi dukanen hain

jahan kaghaz ke TukDon ke 'ewaz kuchh KHwab bikte hain

jahan par beTiyon ke qimti arman bikte hain

suno beTi

tumhaare KHwab aur arman

in lafzon ke sikkon se KHaride ja nahin sakte

jo mera kul asasa hain

suno beTi

tumhaara bap sha'ir hi nahin mujrim bhi hai jis ne

wo sab sikke kamae hain

jo duniya ke kisi bazar mein bhi chal nahin sakte

KHushi mein Dhal nahin sakte

suno beTi

mera ai kash lafzon se koi rishta nahin hota

main manDi mein tijarat kar ke wo kaghaz kamata jo

har ek arman har ek KHwab ki qimat chuka sakte

tumhaara ghar saja sakte

dulhan tum ko bana sakte

suno beTi

mujhe tum se zaruri baat kahni hai