suno tum waqt jaise ho

suno tum vaqt jaise ho

hamesha hī kisī jaldī meñ rahte ho

tumheñ jitnā bachātā huuñ

maiñ jitnā saiñt kar muTThī meñ rakhtā huuñ

tum utnā ḳharch hote ho

suno tum baat jaise ho

adhūrī baat jaise

jo mere hoñToñ pe kab se muntazir hai

aise lamhe kī

jahāñ maiñ kuchh na kah kar bhī

tumheñ har baat kah duuñ

aur tum sab kuchh samajh jaao

suno tum shaam jaise ho

jo din ke sard hone par

hamesha ghar kī nichlī sīḌhiyoñ par

merā istiqbāl kartī hai

mirī tanhā.iyoñ ke canvas meñ rang bhartī hai

suno tum ḳhvāb jaise ho

maiñ jab karvaT badaltā huuñ

yā phir palkeñ jhapaktā huuñ

to mere haath se unglī chhuḌā kar

tum kahīñ pe chhup se jaate ho

maiñ āñkheñ band kar ke phir tumheñ āvāz detā huuñ

magar phir tum kabhī vāpas nahīñ aate

na jaane kis nagar rahte ho tum

kis niiñd meñ bahte ho tum

kuchh bhī to nahīñ khultā

faqat TuuTī huī nīñdeñ hamāre haath aatī haiñ

suno tum phuul jaise ho

maiñ sadiyoñ se

tumhāre ḳhvāb kī ḳhushbū meñ mahkā huuñ

tumhāre kaif ke mausam meñ rahtā huuñ

tumhāre lams ke dhāre meñ bahtā huuñ

suno tum ishq jaise ho

bahut sachche bahut ujle

hamesha itne gahre ki tumhārī khoj meñ nikleñ

to apnī samt kā rasta bhī kho jaa.e

tumheñ kaise koī samjhe

tumheñ kaise koī paa.e

suno tum dhuup jaise ho

tumhāre jism se kirneñ Tapaktī haiñ

maiñ jab palkoñ se ye kirneñ uThātā huuñ

to merī aañkh meñ duniyā chamaktī hai

maiñ in chamkīle lamhoñ meñ

tumhāre saath saaya ban ke chaltā huuñ

havā kī bāñsurī pe

titliyoñ kā lams pahne

vasl ke manzar meñ Dhaltā huuñ

suno tum waqt jaise ho

hamesha hi kisi jaldi mein rahte ho

tumhein jitna bachata hun

main jitna saint kar muTThi mein rakhta hun

tum utna KHarch hote ho

suno tum baat jaise ho

adhuri baat jaise

jo mere honTon pe kab se muntazir hai

aise lamhe ki

jahan main kuchh na kah kar bhi

tumhein har baat kah dun

aur tum sab kuchh samajh jao

suno tum sham jaise ho

jo din ke sard hone par

hamesha ghar ki nichli siDhiyon par

mera istiqbaal karti hai

meri tanhaiyon ke canwas mein rang bharti hai

suno tum KHwab jaise ho

main jab karwaT badalta hun

ya phir palken jhapakta hun

to mere hath se ungli chhuDa kar

tum kahin pe chhup se jate ho

main aankhen band kar ke phir tumhein aawaz deta hun

magar phir tum kabhi wapas nahin aate

na jaane kis nagar rahte ho tum

kis nind mein bahte ho tum

kuchh bhi to nahin khulta

faqat TuTi hui ninden hamare hath aati hain

suno tum phul jaise ho

main sadiyon se

tumhaare KHwab ki KHushbu mein mahka hun

tumhaare kaif ke mausam mein rahta hun

tumhaare lams ke dhaare mein bahta hun

suno tum ishq jaise ho

bahut sachche bahut ujle

hamesha itne gahre ki tumhaari khoj mein niklen

to apni samt ka rasta bhi kho jae

tumhein kaise koi samjhe

tumhein kaise koi pae

suno tum dhup jaise ho

tumhaare jism se kirnen Tapakti hain

main jab palkon se ye kirnen uThata hun

to meri aankh mein duniya chamakti hai

main in chamkile lamhon mein

tumhaare sath saya ban ke chalta hun

hawa ki bansuri pe

titliyon ka lams pahne

wasl ke manzar mein Dhalta hun