supurdagi ka safar ajab hai

tumhāre shāne pe haath rakh ke maiñ kab se mahv-e-safar huuñ jānāñ

maiñ jāntī huuñ basāratoñ kī vo āḳhirī hichkiyāñ vo lamhe

maiñ saare manzar hī kho chukī thī tumhāre shāne pe haath rakh ke

ki jaise andhī sī ik bhikāran

kisī ke qadmoñ se raah chun ke masāfatoñ ke surāġh paa.e

kisī kī āñkhoñ se dasht-e-zulmat rafāqatoñ ke charāġh paa.e

supurdagī kā safar ajab hai

vo raat sāvan kī dhuup jaaḌe kī aañkh terī vo ḳhvāb tere

thakan kī in āḳhirī hadoñ tak badan gunāh-o-savāb tere

junūñ kī rāh-e-amal tarāshī

dil-o-nazar ke latīf jazboñ pe vahshatoñ kā jo pairāhan hai

hisār-e-jāñ se ḳhumār-e-jāñ tak kā ye safar kis qadar kaThan hai

ye qurbatoñ meñ thakan kī ḳhvāhish

ki jaise shah-rag meñ kholte ḳhuuñ kī sarsarāhaT bhī jāñ-ba-lab hai

supurdagī kā safar ajab hai

tumhaare shane pe hath rakh ke main kab se mahw-e-safar hun jaanan

main jaanti hun basaraton ki wo aaKHiri hichkiyan wo lamhe

main sare manzar hi kho chuki thi tumhaare shane pe hath rakh ke

ki jaise andhi si ek bhikaran

kisi ke qadmon se rah chun ke masafaton ke suragh pae

kisi ki aankhon se dasht-e-zulmat rafaqaton ke charagh pae

supurdagi ka safar ajab hai

wo raat sawan ki dhup jaDe ki aankh teri wo KHwab tere

thakan ki in aaKHiri hadon tak badan gunah-o-sawab tere

junun ki rah-e-amal tarashi

dil-o-nazar ke latif jazbon pe wahshaton ka jo pairahan hai

hisar-e-jaan se KHumar-e-jaan tak ka ye safar kis qadar kaThan hai

ye qurbaton mein thakan ki KHwahish

ki jaise shah-rag mein kholte KHun ki sarsarahaT bhi jaan-ba-lab hai

supurdagi ka safar ajab hai