suqraat ki biwi

kahte haiñ baḌī tez thī suqrāt kī biivī

ḳhāvind se bas laḌtī hī rahtī thī vo din-rāt

suqrāt ke apne hī mashāġhil kī thī bohtāt

hairān thā kyoñ kar ho basar aise meñ auqāt

aise meñ kahāñ falsafa sūjhe hai kisī ko

chaltā rahe har vaqt jahāñ daur-e-ḳhurāfāt

hairān thā be-chāra kare bhī to kare kyā

qaabū meñ na biivī thī na bigḌe hue hālāt

kaj-fahm thī ziddī thī qayāmat thī sarāsar

suqrāt ko detī thī vo salavāt pe salavāt

chup rahtā magar sochtā thā dil meñ ye aksar

kyā jāniye kab tak rahe ye sūrat-e-hālāt

tañg aa ke muḳhātib huā biivī se vo ik roz

ai jān-e-vafā mujh ko batā sun ke mirī baat

merā vo gunah kyā hai ḳhatā kyā hai vo merī

kis jurm kī pādāsh meñ miltī hai ye sauġhāt

ye sun ke vo chup ho ga.ī phir taish meñ aa.ī

suqrāt kī dī piiTh pe bas daf.atan ik laat

kahne lagī tū buddhū kā buddhū hī rahā haif

samjhe na tirī aañkh ne qudrat ke ishārāt

ai falsafī kyā soch ke kar baiThā thā shādī

jo jurm kiyā tū ne ye us kī hai mukāfāt

taqdīr ke qaazī kā ye fatvā hai azal se

shādī jo rachātā hai vo pachhtātā hai din-rāt

kahte hain baDi tez thi suqraat ki biwi

KHawind se bas laDti hi rahti thi wo din-raat

suqraat ke apne hi mashaghil ki thi bohtat

hairan tha kyon kar ho basar aise mein auqat

aise mein kahan falsafa sujhe hai kisi ko

chalta rahe har waqt jahan daur-e-KHurafat

hairan tha be-chaara kare bhi to kare kya

qabu mein na biwi thi na bigDe hue haalat

kaj-fahm thi ziddi thi qayamat thi sarasar

suqraat ko deti thi wo salawat pe salawat

chup rahta magar sochta tha dil mein ye aksar

kya jaaniye kab tak rahe ye surat-e-haalat

tang aa ke muKHatib hua biwi se wo ek roz

ai jaan-e-wafa mujh ko bata sun ke meri baat

mera wo gunah kya hai KHata kya hai wo meri

kis jurm ki padash mein milti hai ye saughat

ye sun ke wo chup ho gai phir taish mein aai

suqraat ki di piTh pe bas dafatan ek lat

kahne lagi tu buddhu ka buddhu hi raha haif

samjhe na teri aankh ne qudrat ke ishaaraat

ai falsafi kya soch ke kar baiTha tha shadi

jo jurm kiya tu ne ye us ki hai mukafat

taqdir ke qazi ka ye fatwa hai azal se

shadi jo rachata hai wo pachhtata hai din-raat