suqut-e-shadmani

masarrat ke us lamha-e-be-karāñ meñ ki ham donoñ leTe hue ghaas par niile ākāsh ko dekhte the

tumheñ yaad hogā ki tum ne kahā thā

ḳhushī shādmānī kī kitnī baḌī aur hasīñ saltanat mere zer-e-nagīñ hai

ye maḳhmal sā toshak-numā sabza

havā kā ye kaif-e-ḳhumārīñ

chamaktī huī dhuup ke garm paivast bose

falak kī farāḳhī

fazāoñ kā ye mehrbāna ravayya

aur in sab se baḌh kar tumhārī mohabbat kā sar-shār-o-pur-shor ehsās

ḳhudāyā masarrat kā ye lamha-e-be-karāñ mujh ko pāgal na kar de

magar aaj jab ham vahīñ apne mānūs goshe meñ pinhāñ

usī ghaas taḳhte pe leTe hue niile ākāsh ko dekhte haiñ

to mahsūs hotā hai jaise

zamīn sirf kāñTe ugātī hai

chamaktī huī dhuup par tiir hī tiir haiñ

āsmāñ ek patthar kī sil kī tarah siine par bojh hai

havāoñ se dam ghuT rahā hai

ḳhushī shādmānī kī vo saltanat luT chukī hai

aur ham donoñ dehlī se bhāge hue do muġhal shāhzāde

kisī ajnabī ġhair-mārūf bastī kī kohna sarā.e meñ

be-ḳhvāb karvaT badalte

bas is taak meñ haiñ ki kab aañkh jhapke aur ham apne sāthī ke siine meñ ḳhanjar utāreñ

masarrat ke us lamha-e-be-karan mein ki hum donon leTe hue ghas par nile aakash ko dekhte the

tumhein yaad hoga ki tum ne kaha tha

KHushi shadmani ki kitni baDi aur hasin saltanat mere zer-e-nagin hai

ye maKHmal sa toshak-numa sabza

hawa ka ye kaif-e-KHumarin

chamakti hui dhup ke garm paiwast bose

falak ki faraKHi

fazaon ka ye mehrbana rawayya

aur in sab se baDh kar tumhaari mohabbat ka sar-shaar-o-pur-shor ehsas

KHudaya masarrat ka ye lamha-e-be-karan mujh ko pagal na kar de

magar aaj jab hum wahin apne manus goshe mein pinhan

usi ghas taKHte pe leTe hue nile aakash ko dekhte hain

to mahsus hota hai jaise

zamin sirf kanTe ugati hai

chamakti hui dhup par tir hi tir hain

aasman ek patthar ki sil ki tarah sine par bojh hai

hawaon se dam ghuT raha hai

KHushi shadmani ki wo saltanat luT chuki hai

aur hum donon dehli se bhage hue do mughal shahzade

kisi ajnabi ghair-maruf basti ki kohna sarae mein

be-KHwab karwaT badalte

bas is tak mein hain ki kab aankh jhapke aur hum apne sathi ke sine mein KHanjar utaren