sud-o-ziyan

zindagī ke dard-o-ġham se jāñ-ba-lab

āñsūoñ ko pī rahā huuñ roz-o-shab

dil kī hasrat thī ki ġham kī kaalī rātoñ meñ koī

chāñd ban kar mere āñgan meñ khile

par mirī rāhoñ ke saa.e ho ga.e tārīk-tar

luT ga.e sab zindagī ke ham-safar

ab laboñ kī sarhadoñ par

āh-o-nāla ke sivā kuchh bhī nahīñ

kuchh bhī nahīñ

sang-dil kitnā hai qasr-e-zindagī kā āstāñ

khā gayā mujh ko mohabbat kī zamīñ kā āsmāñ

ab nahīñ mere muqaddar meñ koī kirnoñ kā phuul

kis janam meñ ho ga.ī thī jaane mujh se koī bhuul

chhin gayā merī javānī se mohabbat kā surūr

ruk gayā mere sanam-ḳhāna meñ raqs-e-zindagī

ek muflis kī bhalā daulat se kaisī dostī

zindagī ai zindagī tū kis jahāñ meñ kho ga.ī

ham se nā-mānūs hai ab chāñd tāroñ kī ziyā

ham se nā-mānūs hai ab bāġh-e-ishrat kī fazā

ham se nā-mānūs haiñ pairoñ kī bojhal beḌiyāñ

ham salāsil kī har ik jhankār se vāqif to haiñ

ya.anī zanjīr-o-salīb-o-dār se vāqif to haiñ

ai shab-e-ġham ke charāġho ḳhūn-e-dil jalne to do

nange pairoñ tez kāñToñ par mujhe chalne to do

aag dene do mujhe ahd-e-kuhan kī laash ko

maiñ miTānā chāhtā huuñ har ġhalat parḳhāsh ko

ruuh par insāniyat kī daaġh ban kar hai ayaañ

sah rahā huuñ maiñ ka.ī sadiyoñ se kyoñ sūd-o-ziyāñ

ik zarā sī zindagī ke vāste

itnī sazā

itne tauq itnī salībeñ itne ġham itne sitam

lāla-o-gul ke diloñ meñ kuchh sunahre zaḳhm haiñ

mere siine meñ magar sadiyoñ se gahre zaḳhm haiñ

ik zarā sī zindagī ke vāste

zindagi ke dard-o-gham se jaan-ba-lab

aansuon ko pi raha hun roz-o-shab

dil ki hasrat thi ki gham ki kali raaton mein koi

chand ban kar mere aangan mein khile

par meri rahon ke sae ho gae tarik-tar

luT gae sab zindagi ke ham-safar

ab labon ki sarhadon par

aah-o-nala ke siwa kuchh bhi nahin

kuchh bhi nahin

sang-dil kitna hai qasr-e-zindagi ka aastan

kha gaya mujh ko mohabbat ki zamin ka aasman

ab nahin mere muqaddar mein koi kirnon ka phul

kis janam mein ho gai thi jaane mujh se koi bhul

chhin gaya meri jawani se mohabbat ka surur

ruk gaya mere sanam-KHana mein raqs-e-zindagi

ek muflis ki bhala daulat se kaisi dosti

zindagi ai zindagi tu kis jahan mein kho gai

hum se na-manus hai ab chand taron ki ziya

hum se na-manus hai ab bagh-e-ishrat ki faza

hum se na-manus hain pairon ki bojhal beDiyan

hum salasil ki har ek jhankar se waqif to hain

yani zanjir-o-salib-o-dar se waqif to hain

ai shab-e-gham ke charagho KHun-e-dil jalne to do

nange pairon tez kanTon par mujhe chalne to do

aag dene do mujhe ahd-e-kuhan ki lash ko

main miTana chahta hun har ghalat parKHash ko

ruh par insaniyat ki dagh ban kar hai ayan

sah raha hun main kai sadiyon se kyon sud-o-ziyan

ek zara si zindagi ke waste

itni saza

itne tauq itni saliben itne gham itne sitam

lala-o-gul ke dilon mein kuchh sunahre zaKHm hain

mere sine mein magar sadiyon se gahre zaKHm hain

ek zara si zindagi ke waste