suraj ki salib

siyah rang chādar tanī raat kī

jis pe

tāroñ ke paivand ke aa.ine

jagmagā.e

masā.ib se āzād lamhoñ meñ vo

aur maiñ

donoñ ik dūsre se mile

muskurā.e

muhīb aur kaale shajar

dūdhiyā rang chādar meñ lipTe hue

bā-adab

lā.inoñ meñ khaḌe

ham jidhar chal paḌe

rāste jhilmilā.e

magar manzileñ

aur na koī pata manziloñ kā kahīñ

surma.ī rāste

aaj phir ḳhatm par aa ga.e

chāñdnī jaise dhīmī paḌī

aur zardā ga.ī

shab ne apne paroñ ko sameTā

phisalte hue ḳhvāb

andhī guphāoñ kī jānib baḌhe

aur phir

za.afarāñ rang kohre meñ

ik salīb-e-siyah kī tarah

jab vo ḳhurshīd ubhrā

to maiñ us pe maslūb thā

siyah rang chadar tani raat ki

jis pe

taron ke paiwand ke aaine

jagmagae

masaib se aazad lamhon mein wo

aur main

donon ek dusre se mile

muskurae

muhib aur kale shajar

dudhiya rang chadar mein lipTe hue

ba-adab

lainon mein khaDe

hum jidhar chal paDe

raste jhilmilae

magar manzilen

aur na koi pata manzilon ka kahin

surmai raste

aaj phir KHatm par aa gae

chandni jaise dhimi paDi

aur zarda gai

shab ne apne paron ko sameTa

phisalte hue KHwab

andhi guphaon ki jaanib baDhe

aur phir

zafaran rang kohre mein

ek salib-e-siyah ki tarah

jab wo KHurshid ubhra

to main us pe maslub tha