suraj ubal paDenge

kiran ko tum kis tarah añdheroñ kī chādaroñ meñ lapeT doge

kiran to phūTegī

aur añdhere kī chādareñ tār-tār hoñgī

lahū bahegā

to raat Dhal jā.egī

kisī kī jabīñ se sūraj ubal paḌeñge

(2)

nidā ye aa.ī

ki kaj-kulāhoñ ke taaj chhīno

ye taḳht tārāj kar ke chhoḌo

in ūñche mahloñ ko ḳhaak kar do

ye masnadeñ sab ukhāḌ pheñko

ye gurz-e-āhan

jo tum pe paiham baras rahā hai

uTho

baḌho

baḌh ke gurz-e-āhan ko apne haath meñ thaam lo

ye asā-e-mūsā banegā

zulm-o-sitam ke phaniyar sapoliyoñ ko nigal hī legā

udaas chehre ḳhushī se yuuñ tamtamā.e

jaise bahār ke ḳhvāb jaag uTThe

chahār-sū ek shor-e-labbaik uTh rahā thā

jo kal talak ek be-basoñ kā hujūm thā

aaj jo jarrār lashkar-e-pur-shikoh ban kar baḌhā

to sab tājvar sabhī kaj-kulāh sab shahryār

barg-e-ḳhizāñ kī mānind ḳhaak meñ mil ga.e

faqat ik galīm-poshoñ kā ḳhuun thā

jo sadā.eñ detā rahā

bahāroñ ke qāfiloñ ko

vo masnadeñ taḳht-o-tāj ūñche mahal to qaa.em rahe

na.e kaj-kulāh aa.e

galīm-poshoñ kā lashkar-e-pur-shikoh phir ik hujūm ban kar bikhar gayā

ḳhvāb TuuT kar phir ḳhizāñ ke pattoñ kī tarah

miTTī meñ mil ga.e

phir vo gurz-e-āhan thā

taḳht-o-tāj-e-shahī kā zāmin

(3)

asā-e-mūsā ko kaun rokegā

zulm-o-ġhārat-garī ke phaniyar sapoliye

kab tak Daseñge

kabhī to hāthoñ se nuur phūTegā

aur zulmat-kadoñ meñ sūraj ubal paḌeñge

kiran ko tum kis tarah andheron ki chadaron mein lapeT doge

kiran to phuTegi

aur andhere ki chadaren tar-tar hongi

lahu bahega

to raat Dhal jaegi

kisi ki jabin se suraj ubal paDenge

(2)

nida ye aai

ki kaj-kulahon ke taj chhino

ye taKHt taraj kar ke chhoDo

in unche mahlon ko KHak kar do

ye masnaden sab ukhaD phenko

ye gurz-e-ahan

jo tum pe paiham baras raha hai

uTho

baDho

baDh ke gurz-e-ahan ko apne hath mein tham lo

ye asa-e-musa banega

zulm-o-sitam ke phaniyar sapoliyon ko nigal hi lega

udas chehre KHushi se yun tamtamae

jaise bahaar ke KHwab jag uTThe

chahaar-su ek shor-e-labbaik uTh raha tha

jo kal talak ek be-bason ka hujum tha

aaj jo jarrar lashkar-e-pur-shikoh ban kar baDha

to sab tajwar sabhi kaj-kulah sab shahryar

barg-e-KHizan ki manind KHak mein mil gae

faqat ek galim-poshon ka KHun tha

jo sadaen deta raha

bahaaron ke qafilon ko

wo masnaden taKHt-o-taj unche mahal to qaem rahe

nae kaj-kulah aae

galim-poshon ka lashkar-e-pur-shikoh phir ek hujum ban kar bikhar gaya

KHwab TuT kar phir KHizan ke patton ki tarah

miTTi mein mil gae

phir wo gurz-e-ahan tha

taKHt-o-taj-e-shahi ka zamin

(3)

asa-e-musa ko kaun rokega

zulm-o-ghaarat-gari ke phaniyar sapoliye

kab tak Dasenge

kabhi to hathon se nur phuTega

aur zulmat-kadon mein suraj ubal paDenge