taaruf

nahīñ mumkin miTānā mujh ko misl-e-naqsh-e-pā yaaro

ḳhalāoñ meñ rahūñgā gūñjtā ban kar sadā yaaro

na nā’ra inqalāb-e-nau kā na ġhaibī nidā yaaro

faqat huuñ ik dil-e-sad-chāk se niklī sadā yaaro

nahīñ hai vāsta kuchh bhī mujhe masnad-nashīnoñ se

maiñ huuñ bas be-navāoñ kī navā-e-gum-shuda yaaro

nahīñ bhātī mujhe hargiz riyā-kārī zamāne kī

'ajab kyā jo huuñ duniyā kī nazar meñ kaj-adā yaaro

samajhtā ḳhuub huuñ maiñ farq jo juzv aur kul meñ hai

kahūñ mansūr ke mānind kyoñ ḳhud ko ḳhudā yaaro

faqat taqlīd hī kyoñ tajrabe bhī kuchh kiye jaa.eñ

kareñ aao na.e daur-e-suḳhan kī ibtidā yaaro

mujhe kahnā hai jo kuchh bhī mire ash'ār kahte haiñ

nahīñ kahne ko mere paas kuchh in ke sivā yaaro

gunāhoñ kī mire fehrist lambī hotī jaatī hai

hazāroñ baar tauba kī na chhūTā mai-kada yaaro

kiyā hai tai suḳhan kā ye safar maiñ ne akele hī

na koī ham-safar merā na koī rahnumā yaaro

mirā fan ḳhaam hai tāham tumhāre dil ko chhū legā

mire har she'r par tum bol uThoge marhabā yaaro

nahin mumkin miTana mujh ko misl-e-naqsh-e-pa yaro

KHalaon mein rahunga gunjta ban kar sada yaro

na na’ra inqalab-e-nau ka na ghaibi nida yaro

faqat hun ek dil-e-sad-chaak se nikli sada yaro

nahin hai wasta kuchh bhi mujhe masnad-nashinon se

main hun bas be-nawaon ki nawa-e-gum-shuda yaro

nahin bhati mujhe hargiz riya-kari zamane ki

'ajab kya jo hun duniya ki nazar mein kaj-ada yaro

samajhta KHub hun main farq jo juzw aur kul mein hai

kahun mansur ke manind kyon KHud ko KHuda yaro

faqat taqlid hi kyon tajrabe bhi kuchh kiye jaen

karen aao nae daur-e-suKHan ki ibtida yaro

mujhe kahna hai jo kuchh bhi mere ash'ar kahte hain

nahin kahne ko mere pas kuchh in ke siwa yaro

gunahon ki mere fehrist lambi hoti jati hai

hazaron bar tauba ki na chhuTa mai-kada yaro

kiya hai tai suKHan ka ye safar main ne akele hi

na koi ham-safar mera na koi rahnuma yaro

mera fan KHam hai taham tumhaare dil ko chhu lega

mere har she'r par tum bol uThoge marhaba yaro