taaruf

mire daadā jo british fauj ke naamī bhagoḌe the

na jaane kitnī jailoñ ke unhoñ ne qufl toḌe the

charas kā aur gāñje kā vo kārobār karte the

ḳhudā se bhī nahīñ Darte the bas begam se Darte the

mire taa.e bhī apne vaqt ke mash.hūr cheater the

ka.ī jailoñ ke to vo half-yearly bhī visitor the

har ik ġhunda unheñ ghar baiThe ġhunda-tex detā thā

tijorī toḌne kā fan unhīñ se maiñ ne sīkhā thā

chachā marhūm nāsik jail se jab vāpas aa.e the

to mash.hūr-e-zamāna ik tavā.if saath laa.e the

vo Thumrī dādrā aur bhairvīñ meñ baat kartī thī

tarannum meñ surayyā aur latā ko maat kartī thī

mire vālid ḳhudā baḳhshe kahīñ aate na jaate the

sahar se shaam tak amaañ ke aage dum hilāte the

thī ik bakre numā burrāq dāḌhī un ke chehre par

magar phir bhī kabaDDī khelte the raat ko aksar

maiñ apne baap daadā ke hī naqsh-e-pā pe chaltā huuñ

magar bas farq itnā hai vo ġhunDe the maiñ netā huuñ

police pīchhe thī un ke third-degrē kī ziyāfat ko

mire pīchhe bhī rahtī hai magar merī hifāzat ko

nahīñ parvā ki leader kaun achchhā kaun ganda hai

siyāsat merī rozī hai election merā dhanda hai

siyāsat meñ qadam rakh kar haqīqat maiñ ne ye jaanī

churā kaare kunad aaqil ki baaz aayad pashemānī

mere dada jo british fauj ke nami bhagoDe the

na jaane kitni jailon ke unhon ne qufl toDe the

charas ka aur ganje ka wo karobar karte the

KHuda se bhi nahin Darte the bas begam se Darte the

mere tae bhi apne waqt ke mashhur cheater the

kai jailon ke to wo half-yearly bhi wisitor the

har ek ghunda unhen ghar baiThe ghunda-tex deta tha

tijori toDne ka fan unhin se main ne sikha tha

chacha marhum nasik jail se jab wapas aae the

to mashhur-e-zamana ek tawaif sath lae the

wo Thumri dadra aur bhairwin mein baat karti thi

tarannum mein surayya aur lata ko mat karti thi

mere walid KHuda baKHshe kahin aate na jate the

sahar se sham tak aman ke aage dum hilate the

thi ek bakre numa burraq daDhi un ke chehre par

magar phir bhi kabaDDi khelte the raat ko aksar

main apne bap dada ke hi naqsh-e-pa pe chalta hun

magar bas farq itna hai wo ghunDe the main neta hun

police pichhe thi un ke third-degree ki ziyafat ko

mere pichhe bhi rahti hai magar meri hifazat ko

nahin parwa ki leader kaun achchha kaun ganda hai

siyasat meri rozi hai election mera dhanda hai

siyasat mein qadam rakh kar haqiqat main ne ye jaani

chura kare kunad aaqil ki baz aayad pashemani