taj

jān-e-gulshan aur jānān-e-bahār

jāvedāñ sham-e-shabistān-e-bahār

ifitḳhār-e-rozgār-e-be-sabāt

yādgār-e-bazm-e-vīrān-e-bahār

ik dimāġh-e-san.at-e-marhūm-e-hind

ik charāġh-e-zer-e-dāmān-e-bahār

ambarīñ sabze pe muḳhtār-e-iram

marmarīñ afsar pe sultān-e-bahār

vāqa.ī tābīr-e-ḳhvāb-e-husn-o-ishq

āḳhirī tasvīr-e-tūfān-e-bahār

ḳhāmushī kā naġhma-e-mavvāj hai

taaj ab bhī rif.atoñ kā taaj hai

sub.h-e-jannat kī sabāhat is meñ hai

shām-e-gulshan kī latāfat is meñ hai

is ke har lamhe meñ ik taaza bahār

ik na.ī har vaqt jannat is meñ hai

māddiyat is ko chhū saktī nahīñ

ruuh kī goyā hukūmat is meñ hai

jalva-kārī kam se kam itnī to ho

dekhiye jab ek nudrat us meñ hai

husn kī jo māya-e-mumtāz thī

ab bhī pinhāñ vo amānat is meñ hai

ishrate-nazzāra kī me.arāj hai

taaj ab bhī azmatoñ kā taaj hai

taaj ik bijlī hai lahrātī huī

ik tajallī kaif meñ Duubī huī

yā jabīn-e-hūr kī koī shikan

ik bayāz-e-nūr meñ lipTī huī

bām-o-dar se gumbad-o-mīnār se

har taraf ik chāñdnī phailī huī

aah ye mahfil ziyā-o-husn kī

chāñd-tāroñ se murattab kī huī

is ke har goshe meñ zarroñ kī tarah

daulat-e-kaunain hai bikhrī huī

hai kahīñ nīlam kahīñ pokhrāj hai

taaj ab bhī san.atoñ kā taaj hai

vus.at-e-kaun-o-makāñ kā aa.ina

jalva-zār-e-kahkashāñ kā aa.ina

jis ko duniyā kho ke rotī hī rahī

is matā-e-rā.egāñ kā aa.ina

ek bazm-e-rafta kā mātam-gusār

ik nishān-e-be-nishāñ kā aa.ina

dil-kushā tasvīr-e-sub.h-e-anjuman

dāstān-e-pāstāñ kā aa.ina

azmat-e-mumtāz kī ik jalva-gāh

shaukat-e-shāh-jahāñ kā aa.ina

yādgār-e-mahfil-e-tārāj hai

taaj ab bhī hairatoñ kā taaj hai

jaan-e-gulshan aur jaanan-e-bahaar

jawedan sham-e-shabistan-e-bahaar

ifitKHar-e-rozgar-e-be-sabaat

yaadgar-e-bazm-e-viran-e-bahaar

ek dimagh-e-sanat-e-marhum-e-hind

ek charagh-e-zer-e-daman-e-bahaar

ambarin sabze pe muKHtar-e-iram

marmarin afsar pe sultan-e-bahaar

waqai tabir-e-KHwab-e-husn-o-ishq

aaKHiri taswir-e-tufan-e-bahaar

KHamushi ka naghma-e-mawwaj hai

taj ab bhi rifaton ka taj hai

subh-e-jannat ki sabahat is mein hai

sham-e-gulshan ki latafat is mein hai

is ke har lamhe mein ek taza bahaar

ek nai har waqt jannat is mein hai

maddiyat is ko chhu sakti nahin

ruh ki goya hukumat is mein hai

jalwa-kari kam se kam itni to ho

dekhiye jab ek nudrat us mein hai

husn ki jo maya-e-mumtaz thi

ab bhi pinhan wo amanat is mein hai

ishrate-nazzara ki mearaj hai

taj ab bhi azmaton ka taj hai

taj ek bijli hai lahraati hui

ek tajalli kaif mein Dubi hui

ya jabin-e-hur ki koi shikan

ek bayaz-e-nur mein lipTi hui

baam-o-dar se gumbad-o-minar se

har taraf ek chandni phaili hui

aah ye mahfil ziya-o-husn ki

chand-taron se murattab ki hui

is ke har goshe mein zarron ki tarah

daulat-e-kaunain hai bikhri hui

hai kahin nilam kahin pokhraj hai

taj ab bhi sanaton ka taj hai

wusat-e-kaun-o-makan ka aaina

jalwa-zar-e-kahkashan ka aaina

jis ko duniya kho ke roti hi rahi

is mata-e-raegan ka aaina

ek bazm-e-rafta ka matam-gusar

ek nishan-e-be-nishan ka aaina

dil-kusha taswir-e-subh-e-anjuman

dastan-e-pastan ka aaina

azmat-e-mumtaz ki ek jalwa-gah

shaukat-e-shah-jahan ka aaina

yaadgar-e-mahfil-e-taraj hai

taj ab bhi hairaton ka taj hai